वीरगन्ज । सीमावर्ती प्रवेश बिन्दुमा गरिएको परीक्षण र बालबालिकासहित चलायमान उमेर समूहमा देखिएको कोरोना संक्रमणदरले १४ जिल्लालाई उच्च जोखिममा सूचीकृत गरेको छ। हेलचेक्र्याइँका साथै विद्यालयमा पठनपाठन नियमित गर्ने वा बन्द गर्ने विषयमा सरोकारवाला निकाय र स्थानीय तहबीच समन्वय हुन नसक्दा संक्रमितको संख्या ह्वात्तै बढेको छ।
पीसीआर परीक्षण संख्याको १५.१ प्रतिशतमा संक्रमण देखिएको स्वास्थ्य तथा जनसंख्या मन्त्रालयले जनाएको छ। संक्रमितको ४१.६ प्रतिशत काठमाडौं उपत्यकामा देखिएको छ। पछिल्लो २४ घण्टामा ६ हजार १ सय ५८ जनामा पीसीआर र एन्टिजेन परीक्षण गर्दा ९ सय जनामा संक्रमण पुष्टि भएको स्वास्थ्य मन्त्रालयले जनाएको छ।
एक महिनायता सीमावर्ती बिन्दुमा गरिएको एन्टिजेन परीक्षणमा सबैभन्दा बढी सुदूरपश्चिमका प्रवेश बिन्दुमा कोरोना भाइरसको पोजिटिभ केस पाइएको छ। त्यस्तै एक महिना अवधिमा कञ्चनपुरस्थित त्रिनगर हेल्थ डेस्कमा गरिएको परीक्षणमा ५ सय ४८ जनामा पोजिटिभ पाइएको छ। पछिल्लो २४ घण्टामा ४७ जना संक्रमित थपिएको मन्त्रालयले जनाएको छ।
सीमापारि भारतमा दैनिक २ लाखभन्दा बढी संक्रमित थपिँदा नेपाल पनि प्रभावित हुन पुगेको छ।
सहरी क्षेत्रका विद्यालय बन्द गर्न सिफारिस
कोरोना संक्रमणबाट स्कुले विद्यार्थी बढी प्रभावित भएपछि कोभिड—१९ संकट व्यवस्थापन केन्द्र (सीसीएमसी)ले सहरी क्षेत्रका विद्यालय बन्द गरी भर्चुअल अध्ययन÷अध्यापन गराउन मन्त्रिपरिषद्लाई सिफारिस गरेको छ।
सिंहदरबारस्थित प्रधानमन्त्री तथा मन्त्रिपरिषद्को कार्यालयमा शनिबार बसेको सीसीएमसीको बैठकले वैशाख मसान्तसम्म सहरी क्षेत्रका विद्यालय बन्द गर्न मन्त्रिपरिषद्समक्ष सिफारिस गर्ने निर्णय गरेको हो। पछिल्लो २४ घण्टामा १९ वर्षमुनिका ८९ बालबालिका संक्रमित भएको स्वास्थ्य तथा जनसंख्या मन्त्रालयले जनाएको छ।
कोरोना संक्रमणको जोखिम बढेको निष्कर्ष निकाल्दै बैठकले वैशाख मसान्तसम्म सहरी क्षेत्रका विद्यालय बन्द गर्न सिफारिस गरेको एक मन्त्रीले बताए। आइतबार वा सोमबार बस्ने मन्त्रिपरिषद् बैठकले निर्णय गर्ने जनाइएको छ।
त्यस्तै, बैठकले पार्टी, सभा, समारोह तथा गोष्ठी र भेलालाई पूर्णरूपमा बन्द गर्ने निर्णय गरेको छ। सवारी साधन, कार्यालय, सार्वजनिक स्थानहरूमा कडा रूपमा स्वास्थ्य सुरक्षाका मापदण्डहरू पालना गराउन पनि सरकारलाई सिफारिस गरेको छ। मन्त्रालयले यसअघि संक्रमणबाट अति प्रभावित भनी वर्गीकरण गरेका काठमाडौं, भक्तपुर, ललितपुरसहित १४ जिल्लाका सहरी क्षेत्रका विद्यालयमा जोखिम रहेको जनाएको थियो। मन्त्रालयले काठमाडौं, ललितपुर, कास्की, रूपन्देही, चितवन, बाँके, पर्सा, भक्तपुर, कैलाली, मोरङ, दाङ, सुर्खेत, बारा र बागलुङलाई अति प्रभावित जिल्लामा वर्गीकरण गरेको छ।
शिक्षा मन्त्रालयले शुक्रबार विद्यालय पुनः सञ्चालन कार्यढाँचा २०७७ अनुसार पालिकाले जोखिमको प्रकृतिअनुसार विद्यालय बन्दको निर्णय गर्ने सक्ने जनाएको थियो। सोही अनुसार कतिपय जिल्लाका विद्यालयले आइतबारदेखि कम्तीमा एक साता पठनपाठन बन्द गर्ने निर्णय गरेका छन्।
