जनकपुरधाम। धनुषामा बस र टिपर एकआपसमा ठोक्किँदा १७ जना घाइते भएका छन्।जिल्लाको मिथिला नगरपालिका वडा नं. ९ लालगढको नजिक शनिबार दिउँसो बस र टिपर आपसमा ठक्कर खाँदा १७ जना घाइते भएको धनुषाका प्रहरी प्रवक्ता प्रहरी नायब उपरीक्षक मकेन्द्रकुमार मिश्रले जानकारी दिए।

पूर्व–पश्चिम लोकमार्गमा बीरगन्जदेखि विराटनगरतर्फ जाँदै गरेको प्रदेश २–०३–००१ क ०६९० नम्बरको टिपर र को १ ख ६६९१ नम्बरको बस आपसमा ठोक्किँदा दुर्घटना भएको हो। उक्त दुर्घटनामा घाइते भएकामध्ये एकको अवस्था गम्भीर रहेको धनुषा प्रहरीले जनाएको छ।दुर्घटनामा बस चालक काठमाडौँ बस्ने ४२ वर्षीय केशव संग्रौलाको दुबै खुट्टा र हातमा गम्भीर चोट लागेको छ।

त्यस्तै पर्साको रानीघाट–८ का ४० वर्षीय नन्दु बैठा, मोरङ विराटनगर महानगरपालिका वडा नं. ४ का ४५ वर्षीय बद्री भुजेल, सप्तरी हरिपुर चितामन–७ की ३० वर्षीया आशा देवी चौधरी, सप्तरीको कञ्चनपुरका महिनारायण पण्डित, सर्लाहीको बागमती नगरपालिका वडा नं. ८ की पर्वता ठकुरी र हरिपुर नगरपालिका वडा नं. १ की यमकुमारी खड्का घाइते भएकी छन्।

यस्तै हरिवनका ५ वर्षीय सुजित महरा, अभिषेक महरा, सर्लाहीको बागमती नगरपालिकाकी रामप्यारी देवी महतो, ईश्वरपुर नगरपालिकाकी सोनु कुमारी महतो, पर्साको बीरगन्जकी अस्मिता पटेल, सम्झना पटेल, आयुष पटेल, अंश पटेल, रितेश पटेल र सिरहाको गोलबजारकी रुपा शाही ठकुरी घाइते भएकी छन्। घाइते हुनेमा बालबालिकाहरुसमेत रहेका छन्।