जनकपुरधाम | नेकपा माओवादी केन्द्रले प्रदेश नम्बर २ को संसदीय दलको नेतामा भरत प्रसाद साहलाई चयन गरेको छ। माओवादी केन्द्रको संसदीय दलको आज बसेको बैठकले साहलाई दलको नेतामा सर्वसम्मतले चयन गरेको हो।त्यसैगरि, संसदीय दलको बैठकबाट उपनेतामा जगतप्रसाद यादव, प्रमुख सचेतकमा दिलीप साह, सचेतकमा रुवी कर्णलाई चयन गरिएको छ। पार्टीको प्रदेश नम्बर २ मा ११ जना प्रदेश सभा सदस्य छन्। जसमा चार जना नेकपा एमालेमा गएका छन्।

विगतमा रामचन्द्र मण्डल संसदीय दलको नेता रहेको र उनी नेकपा एमालेमा गएपछि सो पद खाली भएको थियो। खाली पदमा आफू चयन भएको भरत प्रसाद साहले जानकारी दिए। उनले आजको बैठकबाट एमालेतर्फ गएका चार जना प्रदेश सभा सदस्यलाई स्पष्टीकरण सोध्ने निर्णय भएको जानकारी दिए।

सर्वोच्च अदालतको आदेशपछि नेकपा विघटन भएर नेकपा माओवादी केन्द्र र नेकपा एमाले भएपछि चार जना नेताहरु माओवादी केन्द्रमा नफर्किएर नेकपा एमालेतर्फ लागेपछि उनीहरुलाई स्पष्टीकरण सोधिएको साहले बताए। स्पष्टीकरण सोधिएको प्रदेश सभाका सदस्यहरुमा रामचन्द्र मण्डल, ज्वाला साह, मो समिर र कुन्दन कुशवाहा रहेका छन्। उनीहरु पार्टीमा नफर्किएको खण्डमा प्रदेश सभा सदस्यता खारेजको प्रक्रियाको थालनी गरिने समेत साहले बताए।