वीरगञ्ज । चालू आर्थिक वर्ष (आव) २०७७/ ७८ मा मुख्य नाका वीरगञ्जबाट निर्यात व्यापारमा प्रशोधित तेलको वर्चश्व अग्रस्थानमा छ । यो नाकाबाट भटमास र सूर्यमुखी प्रशोधित तेल उल्लेख्य परिमाणमा निकासी भएको वीरगञ्ज भन्सारको तथ्यांकले देखाएको हो ।

चालू वर्षको साउनदेखि फागुनसम्मै भटमासको तेल निकासी सूचीको एक नम्बरमा परेको छ । वीरगञ्ज भन्सारबाट चालू वर्षको आठ महीनमा २६ अर्ब रुपैयाँको बस्तु निर्यात भएकोमा सबैभन्दा बढी योगदान यही उत्पादनको देखिन्छ ।

यो वर्षको आठ महीनामा १५ अर्ब ४४ करोड रुपैयाँबराबरको भटमासको प्रशोधित तेल निर्यात भएको भन्सार अधिकृत रमेश सुकमनीले जानकारी दिए ।

निर्यात व्यापारमा सबैभन्दा बढी योगदान खाने तेलकै रहेको अधिकृत सुकमनीले बताए । अघिल्लो वर्षको सोही अवधिमा ४ अर्ब ८४ करोड रुपैयाँ बराबरको ३७ हजार १३८ मेट्रिकटन यस्तो तेल निकासी भएको थियो । यो वर्ष यस्तो परिमाण १ लाख ८८८ मेट्रिकटन पुगेको छ ।

सूर्यमुखी तेलको निर्यात पनि उल्लेख्य बढेको छ । यो आवको फागुनसम्म ७३ करोड रुपैयाँबराबरको ४ हजार ८८९ मेट्रिकटन सूर्यमुखीको प्रशोधित तेल निर्यात भएको छ । अघिल्लो वर्षको यही अवधिमा यस्तो निकासी २० मेट्रिकटनमात्रै थियो ।

अघिल्लो वर्ष प्रशोधित पाम आयल सर्वाधिक निकासी भएको थियो । भारतले पाम तेल आयातमा प्रतिबन्ध लगाएपछि स्वदेशी उद्योग भटमास र सूर्यमुखी तेलमा केन्द्रित भएका हुन् ।

यो नाकाबाट जुसजामको निकासी घटेको छ । अघिल्लो वर्ष ३ करोड ५१ लाख लिटर जुस निर्यात भएकोमा यो वर्ष ३ करोड २९ लाख लिटरमा झरेको छ । जमोठ कपडाको निर्यात भने बढेको छ । ८ सय २५ मेट्रिकटन यस्तो कपडा निकासी भएको भन्सारको तथ्यांक छ ।

वीरगञ्जबाट वत्तीसा त्रिफला, च्यावनप्रास, दन्तमञ्जन, सेन्थेटिक यार्न, स्पोर्टस् सुज, उनी गलैंचा कार्पेट, तयारी कपडालगायतका उत्पादन निर्यात भएको देखिन्छ । अघिल्लो वर्षको तुलनामा यो नाकाबाट निर्यात व्यापार करीब ३ अर्ब रुपैयाँले बढेको भन्सारको तथ्यांकले देखाएको छ ।

निकासीको अधिकांश अंश भारतीय बजारमा गएको छ । कुल २६ अर्ब रुपैयाँको बस्तु निर्यातमध्ये २३ अर्ब ७७ करोड रुपैयाँबराबरको निकासी भारतमा भएको छ ।