सप्तरी । सप्तरीको राजविराजमा एक जना विद्यार्थी कोरोना संक्रमित भएका छन् । तीन महिना यता कोरोना संक्रमण दर शुन्यमा झरेको जिल्लामा पछिल्लो पटक बिहीबार राजविराज २ निवासी २१ वर्षिय विद्यार्थीमा कोरोना संक्रमण पुष्टि भएको हो ।
स्थानिय गजेन्द्र नारायण सिंह अस्पतालको प्रयोगशालामा स्वाव परिक्षण गर्दा उनमा कोरोना संक्रमण पुष्टि भएको जिल्ला स्वास्थ्य कार्यालयका प्रमुख दुनियालाल यादवले जानकारी दिए ।
पोखरास्थित इन्जिनियरिङ क्याम्पसमा अध्ययनरत उनी एक साताअघि होली मनाउन घर फर्किएका थिए । उच्च ज्वरोसँगै रुघा, खोकी लागेपछि शंका लागेर स्वाव परिक्षण गराउँदा संक्रमण पुष्टि भएका उनलाई होम आइसोलेशनमा राखिएको जिल्ला स्वास्थ्य कार्यालय सप्तरीले जनाएको छ ।
लामो अन्तरालपछि जिल्लामा कोरोना संक्रमित देखिएपछि स्थानियमा पुनः त्रास फैलिएको छ । कोरोना संक्रमणबाट जिल्लामा हालसम्म ४१ जनाको मृत्यु भइसकेको छ ।
यसैबीच जिल्ला स्वास्थ्य कार्यालयले कोरोना संक्रमणबाट जोगिन न्यूनतम स्वास्थ्य मापदण्ड प्रयोग गर्न सबैमा आग्रह गरेको छ । जिल्ला स्वास्थ्य कार्यालयका प्रमुख यादवले अब फेरी सजग हुने अवस्था आएको भन्दै सबैलाई सरकारले तोकेको स्वास्थ्य मापदण्ड पालना गर्न आग्रह गरेका छन् ।
फेरी लकडाउन हुने अवस्था नआओस् यसका लागि सबै सचेत र सजग रहनु पर्छ उनको भनाई छ । महामारीको दोश्रो लहर भित्रिन सक्ने सम्भावनालाई ध्यानमा राखि अहिले जिल्ला भित्रिने तिलाठी–कुनौली नाकामा हेल्प र हेल्थ दुबै डेस्कको स्थापना गरि हरेक व्यक्तिको स्वास्थ्य जाँच्ने काम प्रभावकारी ढंगले सुरु गरिएको समेत उनले जानकारी दिएका छन् ।
