वीरगञ्ज । के वीरगन्जमा फेरि कोरोनाको लहर आउछ त ? आज वीरगञ्जमा पछिल्लो पटक गरिएको पिसिआर परिक्षणमा ८ जना कोरोना संक्रमित थपिएका छन् । वीरगञ्जस्थित नारायणी अस्पतालको पिसिआर प्रयोगशालामा पर्सा जिल्लाका विभिन्न स्थानबाट संकलित ३८ जनाको थ्रोट स्वाबको नमुना परिक्षण गर्दा बाराका २ र पर्सा ६ जनामा संक्रमण पुष्ठि भएको हो ।

बुधवार थपिएका सबै संक्रमित पुरुष हुन् । जसमध्ये वीरगञ्ज महानगरपालिका वडा न. ८ का ५१ वर्षीय पुरुष, वडा न. १० मा २८ र ३८ वर्षीय पुरुष, वडा न. १३ र २३ वर्षीय पुरुष र वडा न. २५ मा ४० वर्षीय पुरुष रहेका छन् ।

त्यस्तै बाराको जितपुर सिमरा उपमानगरपालिका वडा न. ५ का २० वर्षीय पुरुष र वडा न. ९ मा ३१ वर्षीय पुरुषमा संक्रमण देखिएको नारायणी अस्पतालका कोभिड संयोजक डा. सरोजरोशन दासले जानकारी दिए । डा. दासका अनुसार थपिएका संक्रमितहरुको सिटि भ्यालु २३.६ देखी ३२.२ सम्म रहेको छ ।