वीरगन्ज । सुक्खा बन्दरगाह भन्सार कार्यालय वीरगञ्जमा सिसाको परिमाण फरक परेपछि बालाजी ग्लास प्रालीलाई ५ सय प्रतिशत जरिवाना तिराइएको छ ।
सिसा आयात गर्दा कर छल्ने प्रयास गरेको भन्दै प्रालीका आयातकर्तालाई २ करोड ३९ लाख २० हजार रुपैयाँ भन्दा धेरै जरिवाना तिराइएको सुक्खा बन्दरगाह भन्सार कार्यालयका सूचना अधिकारी चुडामणी शर्मा कट्टेलले बताए ।
कार्यालयका अनुसार बालाजीले माघ ३० गते प्रज्ञापनपत्र नम्बर ३४७८ अन्तर्गत ३५७२ स्क्वायर मिटर घोषणा गरेको छ । उक्त कन्टेनरमा ल्याइएको सिसा जाँचपास गर्दा ५ सय ३५ स्क्वायर मिटर बढी ल्याइएको फेला परेको कट्टेलले बताए । बालाजीले घोषणा गरेभन्दा पाँचसय ३५ स्क्वायर मिटर बढी सिसा भन्सार गणकले फेला परेको पनि उनको भनाइ छ ।
सिसाको एमएम घटाएर भन्सार छली गर्न खोजेको आरोपमा ९२ लाख ९६ हजार र घोषणा गरिएको भन्दा बढी परिमाणमा सामान भित्र्याएको कसुरमा भन्सार ऐन अन्तर्गत १ करोड ४६ लाख २४ हजार रुपैयाँ जरिबाना गरिएको कट्टेलले जानकारी दिए ।
बालाजी ग्यासलाई पहिलो चरणको जरिबाना गरिएको र उसले यस अघि कर छली गरे नगरेको बारे थप अनुसन्धान प्रक्रियामा रहेको भन्सार कार्यालय प्रमुख डा.लालबहादुर खत्रीले बताए ।
