वीरगञ्ज ।प्रधानमन्त्री केपी शर्मा ओलीले मुलुकको व्यापार घाटा नियन्त्रण वा सन्तुलनतर्फ फर्किएको बताएका छन्।उद्योग संगठन मोरङको नवनिर्वाचित कार्यसमिति पदस्थापनाका अवसरमा भिडियो कन्फ्रेन्समा बोल्दै प्रधानमन्त्री ओलीले गएको तीन वर्षमा ब्यापार घाटा बढ्दो अवस्थामा रहेको भएपनि हाल ब्यापार घाटा सन्तुलनमा फर्किँदै आएको दाबी गरे।

‘११ अर्ब रुपैयाँ ब्यापार घाटा रहेको अवस्थामा विस्तारै मुलुक नियन्त्रण वा सन्तुलन अवस्थामा फर्किँदैछ,’ उनले भने, ‘अब उद्योगमैत्री वातावरण हुँदै गएको छ। ब्यापार घाटा कम गर्न निर्यातमा जोड दिएका छौँ। आयात घट्दो छ।’

काठमाडौँबाट भिडियोमार्फत जोडिएका प्रधानमन्त्री ओलीले कोभिड १९ को लकडाउनबाट समेत धेरै क्षति नभएको बताए।उनले भने, ‘लकडाउनबाट समेत धेरै क्षति भएको छैन। हाम्रोमा लगभग प्लस माइनस क्षति भएको छ। अर्थतन्त्र नै खस्किने गरी क्षतिको अवस्थामा छैनौँ।’

कोभिड १९ को दोस्रो लहरलाई नियन्त्रणमा राख्दै देश र जनतालाई जोगाउने उनले बताए।सोही क्रममा प्रधानमन्त्री ओलीले संगठनले सुरुआत गरेको मेरो देश मेरै उत्पादन अभियानको उद्घाटनसमेत गरेका थिए। अभियानको उद्घाटन गर्दै उनले रोजगारीको अवसर सृजना, उत्पादन प्रवर्द्धनमा आत्मनिर्भर हुने अवस्था बनाउनु पर्नेमा जोड दिए।

ब्यापार घाटालाई समेत न्यून गर्दै सकारात्मक विन्दुमा पुर्‍याउन यस अभियानले पूरा गर्नेमा प्रधानमन्त्री ओलीले विश्वास लिए।कार्यक्रममा मुख्यमन्त्री शेरधन राईले संगठनको नयाँ कार्यसमितिलाई आगामी कार्यकालका लागि शुभकामना दिएका थिए। औद्योगिक क्षेत्रको साथ सहयोगसँगै प्रदेशको विकासमा प्रदेश सरकार जोडिने उनले बताए।

कार्यक्रममा नवनिर्वाचित अध्यक्ष सुयेश प्याकुरेलले आफ्नो तीनवर्षे कार्यकालको योजना जानकारी गराएका थिए। कार्यक्रममा संगठनका पूर्व अध्यक्ष किशोर प्रधान, नन्दकिशोर राठी, शिवशंकर अग्रवाल, मुकेश उपाध्यायलाई सम्मान गरिएको थियो।