मंगलबार बिहान आईसीपीबाट जाँचपास भई निस्केको बीआर ०६ जीबी ४१५६ नम्बरको भारतीय ट्रकलाई सशस्त्र प्रहरी बलले नियन्त्रणमा लिएर जाँच गरिएपछि धानको बोरा मुनि राखिएको ९३ पोका कपडा बरामद भएको हो । ट्रक चालक भारतीय नागरिक सुनिल यादवलाई समेत प्रहरीले नियन्त्रणमा लिएको छ । थप अनुसन्धानका लागि ट्रकलाई राजस्व अनुसन्धान विभाग पथलैया पठाएको सशस्त्रका एसपी राजेन्द्र खड्काले जनाए ।

‘वीरगन्जको रामगढवा निवासी दिपेन्द्रप्रसाद कलावरको नाममा रहेको तिरुपति खाद्यान्न तथा भुसा सप्लायर्सको नाममा भन्सार प्रज्ञापनपत्र काटिएको पाइएको छ,’ सशस्त्रका एसपी खड्काले भने, ‘प्रज्ञापनपत्रमा ५ सय ५० बोरा धान उल्लेख भए पनि जाँच गर्दा ३ सय बोरा धान बरामद भएको छ ।’ उनका अनुसार ट्रकको माथिल्लो भागमा धानको बोरा र त्यसको मुनि कपडाका पोका राखिएका थिए । ९३ वटा पोका भित्र सर्टिङ, सुटिङ, कुर्ता सुरुवाल, महँगा साडीलगायतका कपडा छन् । कपडाको बजार मूल्य एक करोड ५ लाख रुपैयाँ राजस्व अनुसन्धान कार्यालयले मूल्यांकन गरेको एसपी खड्काले जनाए ।