बीरगन्ज । भारतमा कोरोना सङ्क्रमण बढेपछि सीमावर्ती जिल्ला पर्सामा सतर्कता बढाइएको छ । भारतका विभिन्न राज्यमा कोरोना सङ्क्रमण बढिरहेकोमा सोहीलाई मध्यनजर गर्दै सतर्कता अपनाउन जिल्ला कोभिड व्यवस्थापन कमिटी पर्साको मंगलबार बसेको बैठकले विभिन्न निर्णयहरु गरेको छ ।

बैठकले जिल्लाका सम्पूर्ण सीमा नाकाहरुमा कडाई गर्न मातहतका निकायहरुलाई निर्देशन दिएको छ । साथै, बैठकले भेला, सम्मेलन र भिडभाड हुने कार्यक्रमहरु नगर्न पनि निर्देश दिएको हो ।

यस्तै, आउदैं गरेको होली पर्वलाई मध्यनगर गर्दै २५ जना भन्दा बढीलाई एक ठाउँमा जम्मा हुन नदिने निर्णय समेत गरेको पर्साका प्रमुख जिल्ला अधिकारी आस्मान तामाङले बताए । निर्णय पालना नभएको खण्डमा कारवाही समेत गरिने उनले जानकारी दिए । ​

उनले भारतका विभिन्न स्थानमा कोरोना भाइरसको नयाँ भेरियन्ट देखिएको हुनाले जिल्लाको सम्पूर्ण सीमा नाकाहरुलाई थप व्यवस्थित गर्न नेपाल प्रहरी र सशस्त्र प्रहरी परिचालन गर्ने र स्वास्थ्य चेकजाँचका लागि हेल्थ डेस्क स्थापना गर्ने निर्णय भएको बताए ।

हेल्थ डेस्कमा भारतबाट आएका मानिसहरुको स्वास्थ्य परिक्षण गरिने उनले जानकारी दिए । “भारतमा कोरोना संक्रमण बढिरहेका राज्यबाट आउने व्यक्तिहरुलाई सीमा नाकामा रोकेर आरडीटी परिक्षण गरिने छ । आरडीटीमा पोजेटिभ देखिएको व्यक्तिलाई तत्कालै आरटि–पिसिआर परिक्षण गर्दै आईसोलेट गरिने निर्णय भएको छ,’ तामाङले भने ।

बैठकले तत्कालका लागि गोपाल मण्डली र कलवार धर्मशालालाई क्वारेन्टाईन र नारायणी अस्पतालमा आईसियुसहितको कोभिड विशेष कक्ष सञ्चालन गर्ने निर्णय गरेको उनले बताए । उनले पोखरिया अस्पताल, बगही स्वास्थ्य केन्द्र र भिखमपुरको स्वास्थ्य केन्द्रमा पनि आवश्यकता परेको खण्डमा कोभिड अस्पताल सञ्चालन गरिने जानकारी दिए ।
प्रजिअ तामाङले जिल्लाका सबै पालिकाहरुलाई पनि आ–आफ्नो क्वारेन्टिन र आइसोलेसन व्यवस्थापनमा लाग्न आग्रह गरिएको बताए ।त्यसैगरी बैठकले राती ९ बजेपछि बजार पूर्ण रुपले बन्द गर्नुपर्ने निर्णय गरको छ ।

बैठकमा बीरगन्ज महानगरपालिकाका नगर प्रमुख विजयकुमार सरावगी, पर्साका प्रहरी उपरीक्षक बेल बहादुर पाण्डे, पर्साका शास्त्र प्रहरी उपरीक्षक राजेन्द्र खड्का, नारायणी अस्पतालका मेसु डा. संजय ठाकुर, ट्राफिक प्रहरी निरीक्षक सुमन कार्की लगायतको उपस्थिति रहेको थियो ।