वीरगंज संजालवीरगंज | कोरोनाको दोस्रो लहर बढ्दै गएको छ । तर पनि जनमानसमा यसप्रति कत्ति पनि सावधानी देखिँदैन । दैनिक हेलचेक्य्राइँ र बेवास्ता बढिरहेको छ । मानिसले साार्वजनिक बसमा यात्रा गर्दासमेत मास्क लगाउने गरेका छैनन् । समूहमा बिनामास्क खुला हिंडिरहेका छन् । टोलमा बस्दा कसैले पनि मास्क लगाएको देखिँदैन । सामाजिक दूरी एकादेशको कथाजस्तो हुन थालिसकेको छ । स्थानीयका बीचमा बाक्लो भेटघाट सुरु भएको छ । पिकनिक खाने र रमाइलो गर्ने प्रवृत्तिले समस्यामाथि समस्या सिर्जना गरिरहेको छ ।
मानिस सुसूचित भएका छन् कि दोस्रो लहरको भाइरस आएको छ । यो लहर नेपाल भित्रिएको धेरै दिन भइसकेको छ । भारत यो लहरबाट आक्रान्त छ अहिले । यसले लिने गरेको भ्याक्सिन कोभिसिल्डको भारतमै हाहाकार हुन थालेको छ । तर, नेपालमा भने यसलाई त्यति विधि वास्ता गरिएको छैन । सामान्य सावधानीसमेत नअपनाइएको देख्दा अब कतै दोस्रो लहरले निकै कहर पैदा गर्ने त होइन भन्ने आशंका जन्माएको छ । अहिले सबै नेपालीहरुले कोभिसिल्ड भ्याक्सिनको पहिलो खोप लगाउन पाएका छैनन् । यो अवसरबाट धेरै नेपाली वञ्चित छन् । तथापि भ्याक्सिन लगाएका पनि प्राथमिक रोकथामका लागि उत्तिकै सतर्क र सजग हुनु जरुरी छ ।
कोरोनाको दोस्रो लहर भित्रिइसकेको छ । अब पहिलेको जस्तो सतर्कता र प्राथमिक रोकथामले काम गर्न सक्ने देखिँदैन । त्यसैले, फेरि एकपटक सबै जना चनाखो हँुदै गम्भीर सावधानी अपनाउनुपर्छ । मास्क र स्यानिटाइजरको उचित प्रयोग तथा भौतिक दूरीमा विशेष जोड दिनु जरुरी छ । दोस्रो लहरबाट बच्नका लागि निकै सतर्कता अपनाउनुपर्ने चिकित्सकको चेतावनी छ । कोरोनाको पहिलो लहर पनि छिमेकी देश भारतबाट नै नेपालमा भित्रिएको थियो । हालको दोस्रो लहर पनि त्यहीँबाट भित्रने सम्भावना छ । त्यसो त नेपाल पनि विश्व उडान र अवतरणको ट्रान्जिट प्वाइन्ट भएकाले नेपाल आफंैमा पनि उच्च जोखिम कायमै छ । यसका साथै मानिसको सहसम्बन्ध, बाक्लो आवागमन तथा बिनासतर्कताको भेटघाटले पनि यसलाई बढी सम्भावित बनाउँदै लगेको छ । छिमेकी देश भारतमा संक्रमितको संख्या अत्यधिक बढ्दै जानु र नेपालमा जनस्वास्थ्यका मापदण्ड पालना नगर्ने प्रवृत्तिको बोलवाला रहनुले पनि कोरोना संक्रमणको दोस्रो लहर डरलाग्दो गरी फैलन सक्ने सम्भावना बढेर गएको हो ।
दोस्रो लहर पनि भित्रिइसकेको र जनस्वास्थ्यका मापदण्ड पनि कडाइका साथ पालना नगरिरहेको अवस्थामा एकपटक सिंगो देशलाई नै झकझक्याउनेगरी प्रचारप्रसारलाई देशव्यापी बनाएर लैजानु जरुरी छ । दोस्रो लहर के र कति कारणले बढी क्षति पु¥याउने खालको छ, यसका बारेमा राम्रो जानकारी सम्प्रेषण जरुरी छ । जनता यसका बारेमा अनभिज्ञ नै छन् । यसको रोकथामका लागि पनि जनस्वास्थ्यका मापदण्डलाई कडाइका साथ पालना गर्नु गरिनु जरुरी छ । भिडभाडमा बस्दा संक्रमण फैलने, भेला सम्मेलन गर्दा यसले फैलने र सर्ने वातावरण पाउने तथा विद्यालय, पल्टन, फौज, कारखाना तथा सामाजिक काममा यसले संक्रमणको मौका पाउने भएकाले यी कुरा गर्दा निकै सतर्कता अपनाउनु जरुरी छ । अपनाउनुपर्ने मापदण्डअनुसार आफ्नो आँखा, कान, नाक र मुखलाई अनावश्यक रूपमा छुने गर्नुहुँदैन । यसो गरेमा कोरोना संक्रमणको दोस्रो लहरबाट बच्न सकिनेछ ।
