वीरगन्ज ।  मोरङको बेलबारीमा दशओटा पालिका कार्यक्षेत्र रहेनेगरी जिल्ला जनगणना कार्यालय मोरङ ‘ख’ स्थापना गरिएको छ । मोरङका अन्य पालिका हेर्नेगरी विराटनगरमा यस अघि नै ‘क’ कार्यालय स्थापना भइसकेको छ । आगामी जेठ २५ गतेदेखि मुलुकभरि नै शुरू हुने जनगणनाका लागि पाँचओटा पालिकामा स्थानीय जनगणनाको कार्यालय वैशाख १ गतेदेखि सञ्चालनमा आउने जिल्ला जनगणना अधिकारी सुमन श्रेष्ठले जानकारी दिए ।

उनका अनुसार बेलबारीले सुन्दरहरैंचा, पथरीले कानेपोखरी, उर्लाबारीले मिक्लाजुङ र लेटाङले केराबारी र ग्रामथानको स्थानीय जनगणना कार्यालयले बुढीगंगा हेर्नेछन् । जनगणनाका लागि आवश्यक पर्ने गणक तथा सुपरिवेक्षकको आवेदन सम्बन्धित कार्यालयले लिन थालेको छ । दुवै पद करार सेवाका हुन् । चैत ११ गतेसम्म कार्यालयमै गएर अथवा अनलाइन मार्फत पनि दुवै पदमा आवेदन दिन सकिनेछ ।

सुपरिवेक्षकको तालीम वैशाख १६ देखि २२ गतेसम्म सञ्चालन हुनेछ । उक्त कार्यालयका लागि करीब १५० जना सुपरिवेक्षकको आवश्यकता छ । त्यसैगरी गणकको तालीम जेठ १७ देखि २२ गतेसम्म हुनेछ । करीब ६ सयभन्दा बढी गणकको आवश्यकता छ । गणकहरूले जेठ २५ गतेदेखि असार ८ गतेसम्ममा प्रत्येक घर परिवारको विवरण संकलन गर्नेछन् । असार ८ गते राष्ट्रिय जनगणना दिवसमा मुलुकभरिको गणना कार्य सकिनेछ । विसं १९६८ देखि नेपालमा जनगणना गर्न शुरू भएको थियो । तत्कालीन प्रधानमन्त्री चन्द्रशम्शेरको कार्यकाल रहेको सो अवधिमा नेपालको जनसंख्या ५६ लाख ३८ हजार ७४९ थियो ।

यसपटकको जनगणना संघीयतामा मुलुक गएपछिको पहिलो हो । हालसम्म १२ पटक जनगणना भएको अधिकारी श्रेष्ठले बताए । २०६८ सालको जनगणना अनुसार नेपालको जनसंख्या २ करोड ६४ लाख ९४ हजार ५०४ थियो । यसपटक संघीय राजधानी काठमाडौंमा प्रविधिको प्रयोगमार्फत जनगणनाको तथ्यांक संकलन गरिँदै छ । यसमा गणकहरूले ट्याब्लेट प्रयोग गर्नेछन् । मुलुकका अन्य स्थानमा भने पेपेरमै तथ्यांक संकलन गरिनेछ । अघिल्लो पटकको गणनामा संकलित तथ्यांकहरू नै अपटेड हुनेछन् भने नयाँ विवरणमा सबै किसिमका घरहरूको तथ्यांक लिइँदै छ । दर्ता नभएका र कामदार पनि नराखिएका तर घरभित्र रहेका साना तथा घरेलु उद्योग र व्यावसायको तथ्यांक पनि यो पटक लिइँदै छ ।