वीरगञ्ज | पर्साका दुईवटा खोलामा मापदण्ड विपरित भएको भन्दै नदीजन्य पदार्थ उत्खनन्मा रोक लगाइएको भएपनि कुनै कारबाही बिना नै ठेकेदारलाई पुनः उत्खनन् गर्न अनुमति दिइएको छ।मापदण्ड विपरित नदीजन्य पदार्थ गिटी बालुवा खोलाबाट झिकेको भन्दै पर्साको वीरगञ्ज महानगरपालिका वडा नमबर ३१ स्थित भेडाहा खोला र पर्सागढी नगरपालिकामा रहेको सिंगयाही खोलामा उत्खनन्मा रोक लगाइएको थियो। तर, अहिले फेरि ती खोलाबाट ठेकेदार कम्पनीलाई गिटी बालुवा झिक्न अनुमति दिइएको छ।
मापदण्ड विपरित खोला उत्खनन् गरिएकोले ठेकेदार कम्पनीहरुलाई स्पष्टिकरण सोधिए पनि अहिले कुनै कारबाही नै नगरी फेरि खोला उत्खनन् गर्न दिइएको छ। ठेकेदार कम्पनीलाई जिल्ला अनुगमन समितिले बिना कुनै कारवाही नै फेरि खोलामा उत्खनन् गर्न दिएको हो।समितिले ठेकेदार कम्पनीलाई चेतावनी दिँदै मापदण्डभित्र रहेर कागज गराइ फेरि खोला उत्खन्न गर्न दिएको अनुगमन समितिका प्रमुखसमेत रहेका जिल्ला समन्वय समितिका सभापति नेक महम्मद अन्सारीले जानकारी दिए।
उनले ठेकेदारलाई मापदण्डमा रहेर मात्रै खोला उत्खनन् गर्न भनिएको तथा अब उपरान्त मापदण्ड मिचिएको पाइए कडा कारवाही गर्ने चेतावनीसमेत दिइएको बताए।‘दुबै खोलाहरुबाट केहीदिन अघिदेखि फेरि ठेकेदारलाई गिटी बालुवा निकाल्न अनुमति दिएका छौँ,’ उनले भने, ‘ठेकेदारलाई कागज गराइ चेतावनी दिएर नै खोला उत्खनन् गर्न दिएका हौँ।’
भेडाहा खोलामा मापदण्ड विपरित बर्षेनी भइरहेको उत्खनन्का कारण हरेक वर्ष खोलासित जोडिएका वीरगञ्ज महानगरको ग्रामीण क्षेत्र डुबानमा पर्ने गरेको छ।खोलामा आउने बाढीले महानगरको वडा नम्बर २८, २९, ३० र ३१ मा बालीनालीमा क्षति हुने गरेको छ। एक महिनाअघि भेडाहा खोला र सिंगयाही खोलाबाट ठेकेदारहरुले मापदण्ड विपरित गिटी बालुवा झिकेपछि अनुगमन गरिएको थियो।
अनुगमनको क्रममा ठेकेदारहरुले वातावरणलाई असर पर्ने गरी गिटी बालुवा उत्खनन् गरेको पाइएको थियो। जिल्ला समन्वय समिति पर्साका सभापति नेक महम्मद अन्सारीको नेतृत्वमा पर्साका प्रमुख जिल्ला अधिकारी, नेपाल प्रहरी र सशस्त्र प्रहरीको टोलीले अनुगमन गरेको थियो।अनुगमनको क्रममा ठेकेदारहरुले पाँच फिटसम्म गहिरो गरेर खोलाबाट गिटी बालुवा झिकेका थिए। उनीहरुले जहाँ पायो त्यहीँबाट नदीजन्य पदार्थ झिकेको अनुगमनको क्रममा भेटिएपछि तत्कालै ती दुबै खोलाबाट गिटी बालुवा झिक्नमा रोक लगाइएको थियो। राम मण्डल
