वीरगन्ज ।कर्णाली नदीमा बेपत्ता दैलेखको आठबिस नगरपालिका–३ निमायलकी पाँच वर्षीया बालिका रजनी बडुवालको शव दश दिनपछि फेला परेको छ।
गएको फागुन २३ गते कर्णाली नदीमा फाल हानेर एकै परिवारका पाँच जना बेपत्ता भएका थिए। चार जनाको शव त्यतिबेलै फेला परे पनि सबैभन्दा सानी बालिकाको शव भने दश दिनपछि मंगलबार कर्णाली नदीमा फेला परेको हो।

घटनामा स्थानीय मानसिंह बडुवालकी पत्नी सुकी बडुवालसहित उनका चार सन्तानको मृत्यु भएको छ। रजनीको शव अछामको तुर्माखाध–३ असराघाटस्थित कर्णाली नदीको किनारामा मंगलबार दिउँसो फेला परेको जिल्ला प्रहरी कार्यालय दैलेखले जनाएको छ।

बालिकाको शव पोष्टमार्टमका लागि मंगलसेन जिल्ला अस्पताल अछाम लगिएको छ।पतिसँगको घरायसी झैझगडाको कारण आमा सुकी बडुवालले आफ्ना नाबालक चार सन्तानसहित कर्णाली नदीमा हाम फालेर सामूहिक आत्महत्या गरेको हुनसक्ने प्रहरीको प्रारम्भिक अनुसन्धानले देखाएको छ।घटनामा आमा सुकी, ८ वर्षीय छोरा ललित बडुवाल, १५ वर्षीया छोरी कल्पना बडुवाल, १२ वर्षीया छोरी सरिता बडुवाल र ५ वर्षीया छोरी रजनी बडुवाल को मृत्यु भएको छ। एकै परिवारका पाँच जनाको ज्यान गएको घटनाको थप अनुसन्धान भइरहेको प्रहरीले जनाएको छ।