वीरगञ्ज । आइतबार वीरगञ्जमा सम्पन्न वीरगञ्ज उद्योग वाणिज्य सङ्घको ४५ औं वार्षिक साधारणसभाले उद्योगी सुवोधकुमार गुप्ताको अध्यक्षतामा नयाँ कार्यसमिति चयन गरेको छ । वीरगञ्जस्थित उद्योग वाणिज्य सङ्घमा सम्पन्न सङ्घको निर्वाचनले सर्वसम्मतबाट नेपाल चामल दाल तेल उद्योग सङ्घका अध्यक्षसमेत रहेका गुप्ताको नेतृत्वमा नयाँ कार्यसमिति गठन गरिएको हो । उनले २ वर्षसम्म सङ्घको नेतृत्व गर्ने छन् ।
प्रमुख निर्वाचन अधिकृत बालमुकुन्द खरेलले आज सम्पन्न पदाधिकारीको निर्वाचनमा अध्यक्ष गुप्ताविरुद्ध कसैको उम्मेदवारी नपरेकोले सर्वसम्मत अध्यक्ष पदमा निर्वाचित भएको बताए । यसअघिको कार्यसमितिमा गुप्ता सङ्घको वरिष्ठ उपाध्यक्ष थिए ।
खरेलका अनुसार गुप्ता अध्यक्ष रहेको कार्यसमितिको वरिष्ठ उपाध्यक्षमा अनिलाकुमार अग्रवाल पटवारी, उपाध्यक्षमा हरिप्रसाद गौतम, महासचिवमा मनोजकुमार दास, उद्योगतर्फ सचिवमा अरविन्द्र अमात्य र वाणिज्यतर्फ आषिशकुमार लाठ, कोषाध्यक्षमा गोविन्द शाह, सह-कोषाध्यक्षमा प्रेमचन्द्र गोयल, सह-सचिव उद्योगतर्फ शुशान्त चाचान र वाणिज्यको अनोजकुमार रुङ्गटा चयन भएका छन् ।
अध्यक्ष पदमा निर्वाचित गुप्ता वीरगञ्ज उद्योग वाणिज्य सङ्घको अध्यक्ष पद प्राप्त गर्ने मधेसी समुदायबाट प्रथम व्यक्ति हुन् । नेपाल उद्योग वाणिज्य महासङ्घका कार्यकारिणी सदस्यसमेत रहेका गुप्ता मोहित ग्रुपका अध्यक्ष हुन् । उनि विभिन्न सामाजिक सङ्घ संस्थामा समेत आबद्ध छन् ।
