वीरगञ्ज ।हिन्दूहरूको अर्को एउटा ठूलो पर्व महाशिवरात्रिमा पशुपतिनाथको मन्दिरमा दिनभर भक्तजनको घुइँचो लाग्यो । यतिबेलासम्म ८ लाख भक्तजनले पशुपतिनाथको दर्शन गरेको पशुपति क्षेत्र विकास कोषका कार्यकारी निर्देशक डा.घनश्याम खतिवडाले जानकारी दिए । दर्शन गर्नेबाहेक मेला भर्न झन्डै २५ लाख हाराहारी श्रद्धालु पशुपति आइपुगेको उनले बताए ।

अघिल्लो वर्षको तुलनामा मन्दिरभित्र पुगेर दर्शन गर्ने भक्तजनको कमी भएपनि मन्दिर बाहिर उल्लेख्य रुपमा भक्तजन आएको उनले बताए । पशुपतिनाथको मन्दिरमा आज रातभरि पूजा जारी रहनेछ । गत बर्ष १६ लाख भक्तजनले मन्दिर प्रवेश गरेर पूजा गरेपनि यो वर्ष कोरोनाको त्रासका कारण केही कम भएको खतिवडाले जानकारी दिए । यस्तै यो वर्ष भारतबाट साधु सन्तपनि कम आएका छन् । झन्डै ३ हजार हाराहारी जोगी साधु सन्त पशुपति आएको कोषले जनाएको छ ।

यो वर्षको महाशिवरात्रि पर्व व्यवस्थापनका लागि ७ हजार प्रहरी खटिएका छन् । महानगरीय प्रहरी परिसरका एसएसपी रमेश कुमार बस्नेतले ७ हजार जनपद प्रहरी मात्रै खटिएको र सशस्त्र र सेनाको थप संख्या रहेको जानकारी दिए ।

लाखौंको भीडभाडमा केही भक्तजनको पाकेटमारी पनि भएको छ । कतिपयको गोजी काटेर पर्स निकालिएको र कतिपयको मोवाइल हराएको छ । केही ब्यक्तिको हराएको पर्स फेला पारी दिइएको एसएसपी बस्नेतले जानकारी दिए ।

प्रहरीले सिसीक्यामेरा, ड्रोन क्यामेरा लागयतका उपकरणबाट मेलाको निरीक्षण गरेको उनले बताए । पशुपतिको बनकालीतर्फ युवायुवतीको भीड नियन्त्रण लिन प्रहरीले लाठीचार्ज समेत गरेको थियो । पूजा गर्न लाइनमा बसेका बेला बेहोस भएका केहीलाई उपचारका लागि एम्बुलेन्समा हालेर अस्पताल पु¥याइएको प्रहरीको भनाइ छ ।

पशुपतिनाथको मन्दिर बागमती पारी बनकालीमा दिनभर भारतबाट आएका जोगी तथा साधुसँग यूवाहरु गाँजा खरिद गरिरहेका देखिन्थे । कागजको पोका तथा चुरोटको खोलमा बेरिएका गाँजा खुल्लम खुल्ला बिक्री भइरहेको थियो भने युवायुवतीहरू गाँजा तानिरहेको दृश्य सामान्य थियो । गाँजा किनबेच तथा सेवनमा प्रहरीले कुनै अवरोध गरेन ।

बनकालीमै युवाहरुको एउटा समूहले ‘जय शम्भो’ डिजे कन्सर्ट समेत गरिरहेको थियो । ड्रम सेट म्युजिकको तालमा युवायुवतीहरू नाचिरहेका थिए । यस्तै पशुपतिनाथ मन्दिर छेउछाउ विभिन्न संघ संस्थाले निःशुल्क स्वास्थ्य शिविर, पानी वितरण तथा खानेकुरा वितरण गरेका थिए ।

यस्तै भक्तजनको चाप अनुसार ट्वाइलेटको व्यवस्थापनमा पशुपति क्षेत्र विकास कोष चुकेको भक्तजनले गुनासो गरेका थिए । साथै घण्टौंदेखि लाइनमा बसेका भक्तजनलाई मतलव नगरी भीआईपीका आफन्तलाई लाइनबिना नै मन्दिर प्रवेश गराउने क्रम यो वर्षपनि रोकिएन ।

सिन्धुपाल्चोकको मेलम्ची खोलाको पानी भर्खरै काठमाडौंको सुन्दरीजल आइपुगेको अवसरमा यसैवर्षको शिवरात्रिमा बागमतीमा मेलम्चीको पानी मिसाइयो । हाल पानी परिक्षणका क्रममा काठमाडौं आइपुगेको पानी वागमतीमा छोडिए पनि पशुपतिमा नुहाउन मिल्ने पानी भने बगेन ।

प्रधानमन्त्री केपी शर्मा ओली तथा पशुपति क्षेत्र विकास कोषले यस वर्षको शिवरात्रिमा बागमतीमा नुहाउन मिल्ने दावी गरेपनि फोहोर कालो पानी बगेको थियो । पानीको प्रवाह मात्रात्मक रुपमा बढेपनि भक्तजनले नुहाउन सक्ने पानीको अवस्था थिएन ।