पर्सा । खुल्ला सीमाको फाइदा उठाउँदै दक्षिण भारतबाट नेपालमा प्रवेश गरी अपराधिक गतिविधि गर्ने भारतीयको लगत फर्छ्योटमा अझै सुधार गर्न सकिएको छैन।

सीमावारी आई अपराध गरी पुनः सीमा कट्ने हुँदा पर्सा जिल्ला अदालतले दोषी ठहर गरिसकेका विदेशीको लगत फर्छ्योटमा सुधार गर्न अझै नसकिएको हो। 

अदालतले दोषी ठहर गरिसकेको मध्ये अझै १ सय ८६ जना विदेशीको लगत फर्छ्योट गर्न अझै बाँकी रहेको पर्सा जिल्ला अदालतको तहसिल शाखाले जनाएको छ।

यो लगतमा पनि गम्भीर प्रकृतिका अपराध गरी कैद मात्र फैसला सुनाएका १४ जना रहेको पर्सा जिल्ला अदालतको तहसिल शाखाका प्रमुख विनोद पोखरेलले बताए।

त्यसैगरी जरिवाना मात्र सुनाइएका पनि ५६ जना र जरिवाना तथा कैद दुवै सजाय सुनाइएका सबैभन्दा बढि अर्थात १ सय १५ जना छन्। ‘स्वदेशी नागरिक बाहेक सबैलाई विदेशी भनिने हुँदा पर्सा जिल्ला अदालतको लगत अनुसार दोषी ठहर भएका सबै भारतीय नागरिक रहेको नै खुलेको छ,’ उनले भने।  

चालू आर्थिक वर्षको माघ महिनामा एक जना फेरि थपिँदा पर्सा जिल्ला अदालतले विदेशी नागरिकबाट लगत फर्छ्योट गर्न १ सय ८६ पुगेको हो। चालू आर्थिक वर्षको माघ सम्म कैद मात्र फैसला सुनाइएका २ जना र कैद तथा जरिवाना दुवै ठहर भएका ६ जना गरी ८ जनाको भने लगत फर्छ्योट भएको छ।

तथापि, जिम्मेवारी सरी आएका सहित दोषी ठहर सबैको हकमा भने अदालत आफ्नो प्रकृयामा लागिरहेको फर्छ्योट हुन भने अझै बाँकी रहेको तहसिल शाखा प्रमुख पोखरेलले तर्क गरे।  

दोषी ठहर नेपालीको पनि लगत फर्छ्योट बाँकी 

यता विभिन्न अपराधमा संलग्न भएका नेपालीहरूको संख्या पनि माघ महिनामा पनि १ सय ९७ जना थपिएको छ।

यो संख्या सहित यहाँ अपराधमा संलग्न भई अदालतले दोषी ठहर गरेपछि फरार हुने नेपालीको कुल संख्या पनि ३ हजार २ सय ७४ पुगेको पर्सा जिल्ला अदालतको तथ्यांकले देखाएको छ। यो संख्यामा गत वर्षसम्मको जिम्मेवारी सरी आएको संख्या सबैभन्दा धेरै अर्थात ३ हजार ७७ रहेको छ।

यो संख्यामा ७५ जनालाई कैद मात्र छ। १ हजार ८ सय ९९ जनालाई जरिवाना र १ हजार १ सय ३ जनालाई भने कैद र जरिवाना दुवै सुनाइएको तहसिल शाखा प्रमुख पोखरेलले बताए। तहसिलमा सबैभन्दा बढि मुलुकको पछिल्लो नयाँ संरचना र स्थानीयको असहयोग पनि रहेको उनले बताए।