वीरगन्ज ।शुक्रराज ट्रपिकल तथा सरुवा रोग अस्पतालको आइसीयुमा भर्ना हुने कोरोना संक्रमितको संख्या घट्दो छ। सो अस्पतालको आइसियुमा कात्तिकमा ६१ जना संक्रमित भर्ना भएकोमा मंसिरमा ५७ र पुसमा २७ जना मात्र संक्रमित भर्ना भएका थिए।

अस्पतालको यस ग्राफले आइसीयुमा भर्ना हुने संक्रमितको संख्या घट्दो क्रममा रहेको देखाउँछ।

माघ महिनामा २८ जना संक्रमित सिकिस्त भएर आइसीयुमा भर्ना भएका थिए। जबकी फागुनको आधा महिनामै आइसीयुमा भर्ना हुनेको संख्या नै २० पुगिसकेको छ।

यो ग्राफले स्पष्ट पार्छ, कोरोनाले सिकिस्त भएर अस्पताल भर्ना हुने संक्रमितको संख्या घट्दो छ, तर रोकिएको छैन।

प्रमुख कन्सल्ट्यान्ट डा अनुप बास्तोला अस्पतालमा बिरामी थपिने क्रम घटे पनि नरोकिएको बताउँछन्। भन्छन्, ‘कोभिडबाट सिकिस्त बिरामी अझै हुनुहुन्छ। अर्थात् बिरामी थपिने क्रम घटेको हो, रोकिएको छैन।’

उनका अनुसार महामारीको समयमा जस्तो अस्पतालमा बिरामीको चाप थेगिनसक्नु त छैन तर आउने क्रम पनि रोकिएको छैन।

संक्रमित र मृतकको संख्या अंकमा घटे पनि जोखिम उस्तै छ। तर मानिसहरु अहिले निस्फिक्री भएर हिँड्न थालेका छन्। जनस्वास्थ्यका मापदण्ड पालना गर्ने अहिले कमै भेटिन्छन्। यो क्रमले कोरोनाको जोखिम झनै बढाउने डा बास्तोला बताउँछन्।

‘बाहिर देख्दा अब कोरोना नै छैन जस्तो लाग्छ। खोप आइसक्यो वा कोरोना अब सकियो भनेर हो की मान्छेहरु ढुक्क देखिन्छन्,’ उनले भने, ‘तर यसले झनै जोखिम बढाउँछ।’

मास्कको प्रयोग, हात धुने र सामाजिक दूरी कायम गर्ने, यी तीन वटा व्यवहार कोरोनाबाट बच्न सकिने मुख्य र प्रभावकारी उपाय हुन्। तर यही जनस्वास्थ्यका मापदन्डलाई नेपालीले पालना गरिरहेका छैनन्।

शुक्रराज अस्पतालमा हाल आठ जना आइसीयुमा गरी १० जना कोरोना संक्रमित उपचाररत छन्। आइसीयुमा भर्ना हुने अधिकांश बिरामी निमोनिया भएर आउने गरेको डा बास्तोलाले बताए। यो महिना आइसीयुमा भर्ना हुने संक्रमितको संख्या अघिल्लो महिनाको तुलनामा बढ्न सक्ने उनको आशंका छ।

‘माघमा २८ जना संक्रमित आइसियुमा थिए। तर अहिले फागुनको बल्ल आधा हुँदैछ तर आइसियुमा भर्ना हुनेको संख्या २० पुगिसक्यो। त्यसैले यो महिना अलि बढी हुन्छ कि भन्ने आशंका छ,’ उनले भने।

कोभिड–१९ विरुद्धको खोप आएका कारण पनि मानिसहरु निर्धक्क हुन थालेको उनको अनुभव छ। खोपको कभरेज नेपालभर नभएसम्म ढुक्क हुने अवस्था नरहने उनी सुनाउँछन्।

कोरोना संक्रमण शून्यमा नझरेसम्म जोखिम रहिरहने भएकाले जनस्वास्थ्यका मापदण्ड पालना गर्न उनको आग्रह छ।

‘कोरोना अझै पनि समुदायमा छ,’ उनले भने, ‘फैलावटको गति पहिलेको जस्तो तीव्र नहोला तर जोखिम अझै पनि छ। संख्या शून्यमा झरेको छैन। मत्थर नभएसम्म जनस्वास्थ्यका मापदण्ड पालना गर्नैपर्छ।’