बिरगंज | नेपालको कुल जनसंख्याको १.४ प्रतिशत व्यक्तिले कोरोना भाइरसविरुद्धको खोप लगाएका छन् ।स्वास्थ्य तथा जनसंख्या मन्त्रालयले बुधबार सार्वजनिक गरेको प्रारम्भिक तथ्यांकअनुसार खोप अभियानको पहिलो चरणमा ४ लाख २९ हजार ७०५ जनाले खोप लगाएका छन् ।
५ लाख ७ हजार ६०६ जनालाई खोप लगाउने लक्ष्य राखिएकोमा ४ लाख २९ हजार ७०५ ले खोप लगाएका हुन् । जसमा सबैभन्दा बढी स्वास्थ्यकर्मी र स्वास्थ्य संस्थामा कार्यरत १ लाख ३७ हजार ८ सय ८६ जना कर्मचारी रहेका छन् ।
यस्तै ३२ हजार ८ सय ३८ महिला स्वयंसेविका, ६ हजार ५ सय ५५ सरसफाईकर्मी, ४ हजार २ सय ६० शव व्यवस्थापनमा खटिएका सुरक्षाकर्मीलाई पनि खोप लगाइएको छ ।
स्वास्थ्य मन्त्रालयले एम्बुलेन्स चालक, वृद्ध आश्रममा रहेका व्यक्तिहरु, कैदिबन्दी, पत्रकार, कूटनीतिक नियोगका कर्मचारी, जिल्ला अदालतका कर्मचारी बैंकका कर्मचारी, सशस्त्र प्रहरी, जनपथ प्रहरीलाई पहिलो प्राथमिकताको पहिलो चरणमा खोप लगाएको जनाएको छ ।
यस्तै, सरकारले यही फागुन २३ गतेदेखि पहिलो प्राथमिकताको दोस्रो चरणमा ५५ बर्ष उमेर माथिका जेष्ट नागरिक, प्राध्यापक, शिक्षक कर्मचारी, सार्वजनिक यातायातका चालक र सहचालकलाई खोप लगाउने निर्णय गरेको छ ।
यस्तै पहिलो डोज खोप लगाउदा एलर्जी भएका व्यक्तिलाई दोस्रो डोज खोप नदिइने पनि मन्त्रालयले जनाएको छ ।
दोस्रो डोज खोप बैशाख ७ देखि १५ गते भित्रमा सबैलाई दिईसक्ने र त्यसपछि दोस्रो खोप अभियानमा सामेल भएकाहरुलाई दोस्रो डोज दिने गरी तयारी भएको खोप शाखा प्रमुख डा. झलक गौतमले जानकारी दिए ।
भारतले दिएको १० लाख डोज कोरोना खोप ‘कोभिसिल्ड’ नेपाल आएसँगै गत माघ १४ गतेबाट खोप अभियान सुरू गरिएको थियो ।
