वीरगञ्ज । आदिवासी जनजाति, तामाङ र शेर्पा समुदायले २६५७ औँ सोनाम ल्होसार बीरगञ्जमा मनाइएको छ । हरेक वर्ष माघशुक्ल प्रतिपदाका अवसरमा विभिन्न कार्यक्रम गरी सोनाम ल्होसार पर्व मनाइन्छ । शुक्रबार आदिवासी जनजाति समुदाय तामाङ र शेर्पा समुदायले सोनाम ल्होसारका अवसरमा बीरगञ्जमा प्रभात फेरी निकालिएका छन् ।

वीरगञ्जको माईस्थान गहवामाई मन्दिबाट सुरु भएको प्रभात फेरी घण्टाघर हुँदै भिस्वा गुम्बा पुगेर टुंगिएको हो । तासिताङ्ग थरवालिङ्ग बौद्ध गुम्बा समितिका अध्यक्ष रामबहादुर थापाको संयोजकत्वमा आयोजित प्रभात फेरीपछि सांस्कृतिक कार्यक्रम समेत आयोजना गरिएको थियो ।

शुक्रबारदेखि मुसा वर्ष पूरा गरी गाई वर्ष प्रवेश हुन्छ । मुसा, गाई, बाघ, खरायो, ड्रागन (मेघ), सर्प, घोडा, भेडा, बाँदर, चरा, कुकुर र सुँगुर गरी १२ किसिमका वर्ष हुन्छन् । तामाङ, गुरुङ,शेर्पा लगायत भाषामा ल्हो भनेको वर्ष र सार भनेको फेरिनु हो । प्रभात फेरी तथा सांस्कृतिक कार्यक्रममा वीरगञ्जमा रहेका आदिवासी जनजाति समुदाय तामाङ र शेर्पा समुदायहरुको सहभागिता रहेको पत्रकार जगत राईले बताए ।