धनगढी । कैलालीमा एक जना वडा सदस्यको ट्र्याक्टर राख्ने घरमा युवती झुन्डिएको अवस्थामा मृत फेला परेकी छन्।
गौरीगंगा नगरपालिका ३ का वडा सदस्य निरज चौधरीको ट्र्याक्टर राख्ने घरमा २२ वर्षीया अञ्जिता चौधरी आइतबार बिहान मृत भेटिएकी हुन्।
अञ्जिता र वडा सदस्य चौधरी प्रेम सम्बन्धमा रहेको स्थानीयले बताएका छन्। वडा सदस्य चौधरी विवाहित हुन्।
प्रेम सम्वन्धबारे गाउँमा थाहा भएपछि शनिबार राति ११ बजेसम्म छलफलपछि निकास नआएपछि भोलि छलफल गर्ने भनेर घर फर्किएका थिए। तर अञ्जिता चौधरी भने कति बेला वडा सदस्यको घरमा आइन् भन्नेबारे भने थाहा नभएको स्थनीयले बताएका छन्।
गौरी गंगा नगरपालिकाका उपमेयर अञ्चला चौधरीले नगरपालिकामा सुसाइट गरेको भन्ने जानकारी आएको बताइन्। उनले चौधरीलाई कार्यवहाकको जिम्मेवारी नदिएको समेत स्पष्ट पारिन्।
जिल्ला प्रहरी कार्यालय, कैलालीका प्रहरी नायब उपरीक्षक (डिएसपी) प्रतिक बिष्टले युवती वडा सदस्यको घरमा झुण्डिएको अवस्थामा मृत फेला परेको जानकारी दिए।
उनले इलाका प्रहरी कार्यालय मालाखेतीबाट डिएसपी प्रेमबहादुर शाहीको टोली घटनास्थलतर्फ गएको र अनुसन्धानकै क्रममा भएकाले अहिले केही भन्न नसकिने उनले बताए।
कोठामा चुकुल लगाएको अवस्थामा शव फेला परेको प्रहरीले जनाएको छ। पारिवारिक स्रोतका अनुसार निरज र अञ्जिता लामो समयदेखि प्रेम सम्बन्ध थिए।
वडा सदस्य निरज अहिले फरार छन्। उनको खोजी भइरहेको प्रहरीले जनाएको छ।
