जनकपुरधाम । भनिन्छ पति पत्नि सुख दु:खको साथी हुन्छ तर विवाहको तीन वर्ष नबित्दै एक महिला विस्थापित भएकी छन्। सासु–ससुराको हिंसा सहँदै आएकी महोत्तरीकाे बलवा नगरपालिका वडा नं. ६ बनौटाकी २५ वर्षीया अनिता देवी साह पति महिला लिएर भागेपछि दुई वर्षीय छोरासहित न्यायको लागि भौतारिँदै छिन् ।

सर्लाहीको चक्रघटना गाउँपालिकाकाे पररिया निवासी विष्णुदेव साहले २०७४ साल फागुन २५ गतेका दिन छोरी अनिताको झण्डै २५ लाख रुपैयाँ खर्च गरेर विवाह गरेका थिए । उनले दाइजोमा नगद साढे १२ लाख रुपैयाँ दिएका थिए भने ५ लाख बराबरको गरगहना, ३ लाख २० हजारको मोटरसाइकलसहित भोजभतेर गरेर २५ लाख खर्च गरि महोत्तरीका मनिष साहसँग छोरीको विवाह गरेका थिए ।

शान्त स्वभाव रहेकी अनिताले बुवा–आमाले बिहेको लागि केटा चयन गरेपछि उनीहरुकै चयनको आधारमा विवाह गरेकी थिइन् ।

‘म कक्षा १० पास गरेर ११ मा पुगेकी थिएँ’, अनिताले भनिन् ‘नातामा दाइ पर्ने मेरो गाउँमा आउँदा उनीसँगै उनका साथी आएका थिए । उनले मलाई मन पराएको कुरा भनेपछि विवाहकाे कुरा अगाडि बढ्याे।’

बुवा आमाको निर्णयको विपरीत नजाने अनिताले परिवारकै निर्णय अनुसार बिहे पनि गरिन् । विवाहको केहि दिनसम्म सबैकुरा ठिकठाक बित्यो तर केहि दिन पछि सासु, ससुरा र नन्दले विभिन्न बहानामा पीडा दिन थालेको अनिता बताउँछिन् ।

अनिता भन्छिन्, ‘सुरुमा थप दाइजो मागेर ल्याउन भनी यातना दिँदै आएका थिए अहिले पति पनि तिमी भन्दा सुन्दर केटीसँग दोश्रो विवाह गरिसकेको छु । तिमी यहाँबाट गईहाल भन्दै कुटपिट गर्छन् ।’

अनिताका सासु र ससुराले केही दिन पहिला मात्र मुखमा कपडा कोँचेर शरीरको विभिन्न भागमा निलडाम हुने गरि कुटेकाे अनिताले बताइन् ।

उनले भनिन्, ‘लकडाउन सुरु हुँदाकाे समय सासु र ससुराले खुट्टामा काँटी घोपेका थिए । काँटी घोपेपछि घरबाट छिमेकमा जाँदा कसैले सहयोग गरेनन् एकजनाले सहयोग गरे पनि ससुरामा थाहा पाए र मलाई त्यहाँबाट कुट्दै लगे।’

अत्याचार सहन नसकेपछि आफू प्रहरीमा गएकाे तर प्रहरीले जनता समाजवादी पार्टीका प्रदेश सांसदद्वय सुरिता साह र जानकी साहको उपस्थितिमा घटना मिलापत्र गरेकाे उनले बताइन्।

आगामी दिनमा यातना नदिने सहमति भएपछि अनिता घर गइन्। तर उनीमाथि ज्यादती राेकिएन। अब उनले घर छाड्ने निर्णय लिइन्।

पछिल्लोपटक तातो छोल्लीले कुटेपछि प्रहरीमा जाँदा पुनः मिलापत्र गराएको र नयाँ ठाउँमा बस्न भनेपछि दुई वर्षीय छोरा र पतिसहित जनकपुरधाम बस्न आएको अनिताले बताइन्।

‘जनकपुरधाम आउँदा हामी ६ दिन सम्म सँगै बस्याैँ । उहाँ बिहान गएर राति मात्रै आउनुहुन्थ्याे । तर साताैँ दिन त उहाँ आफ्नाे सामान लगेर हामीलाई अलपत्र पारेर हिँड्नुभाे’, उनले भनिन्।

केही दिन भोकै बसेकी अनिताको बारेमा उनको घरबेटीले बुवालाई फोन गरेर भनेपछि मात्र बुवा विष्णुदेव साहले थाहा पाए।

सासु, ससुरा र श्रीमानबाट नै पीडित भएकी अनिता अहिले पनि आफ्नो घरमै बस्न चाहन्छिन् । उनले श्रीमान अन्य महिलासँग भागेको भन्दै भनिन्, ‘म उहाँ भागेको महिलासँग पनि बस्न तयार छु। तर याे अवस्थामा म उहाँलाई छाडेर कहाँ जान्छु बच्चा लिएर ?’

अहिले अनिता ओरेक नेपालको सेफ हाउसमा बसेकी छन् । यता अनिताका बुवा विष्णुदेव साहले मनिषले अनितालाई जनकपुरधामको भ्रमरपुरा चौक नजिक एक डेरामा राखेर सम्पूर्ण गरगहना र मोबाइल समेत लिएर फरार भएको बताउँछन् ।

छोरी अनितालाई लिएर पुनः बनौटा र जिल्ला प्रहरी कार्यालयमा पुग्दा प्रहरीले पनि चासो नलिएको साहले बताए । उनले मनिषको आफन्त प्रदेश सांसद रहेकोले प्रहरी पनि सहयोग नगरेको आरोप लगाए ।

यता इलाका प्रहरी कार्यालय बनौटाका प्रमुख प्रहरी सहायक निरीक्षक (सई) रविन्द्र सिंहले आफूहरुले पटक पटक सहमति गराउने प्रयास गरे पनि सहमती नभएको बताए । उनले साउन महिनामा एसपीकै उपस्थितिमा अबदेखि यातना नदिने भनी लिखित सहमति भए पनि त्यो सहमति कार्यान्वयन हुन नसकेको बताए ।

उनले पारिवारिक विवाद सहमतिबाटै निकास खोजौँ भनी सासु ससुराबाट टाढा बसेपछि विवाद अन्त्य हाेला भनेर श्रीमान श्रीमती दुवैलाई जनकपुरधाम गएर बस्न पठाएको बताए ।

‘तर केही दिन पछि नै त्यहाँबाट केटा फरार भयो’, उनले भने ।

घटनापछि अनिताका बुवाले प्रहरीमा दिएकाे उजुरीका आधारमा फरार रहेका मनिषकाे खोजी भइरहेको उनले बताए ।