वीरगञ्ज । नेपाल कम्युनिष्ट पार्टी नेकपा प्रचण्ड माधव समूहले गरेको देशव्यापी आमहड्तालको प्रभाव संघीय राजधानी काठमाडौंसहित देशभर परेको छ । देशका विभिन्न ठाउँबाट नेकपाका नेता कार्यकर्ता पक्राउ परेका छन् भने ठाउँ ठाउँमा गाडीहरु तोडफोड गरिएका छन् । आज को नेता पक्राउ परे ?

१. ​कलंकीबाट स्थायी कमिटी सदस्य तथा वागमती प्रदेश इन्चार्ज अष्टलक्ष्मी शाक्य, केन्द्रीय सदस्य तथा केन्द्रीय संघर्ष समितिका सचिव डा. विजय पौडेल, केन्द्रीय कमिटी सदस्य हितमान शाक्य, केन्द्रीय कमिटी सदस्य तथा अखिल नेपाल महिला संघकी अध्यक्ष अमृता थापा लगायतका नेता–कार्यकर्ताहरुलाई विहानै गिरफ्तार गरिएको छ ।

२. ​चाबहिलबाट केन्द्रीय कमिटी सदस्य कृष्ण के.सीसहितका नेताहरुलाई गिरफ्तार गरिएको छ भने बागबजारबाट युवा नेता रमेश मल्लसहित विद्यार्थीहरुलाई गिरफ्तार गरिएको छ ।

३. ​काठमाडौँका विभिन्न स्थानबाट गिरफ्तार गरिएका ७२ जना नेता–कार्यकर्तालाई प्रहरी प्रशिक्षण प्रतिष्ठान महाराजगञ्जमा राखिएको छ ।

४. ​तनहुँमा केन्द्रीय कमिटी सदस्य प्रतापलाल श्रेष्ठका साथै अतिन्द्रकेशरी न्यौपाने, ओमराज आले, विष्णुभक्त सिग्देल, श्रीराम कार्कीसहित १६ जना नेता–कार्यकर्तालाई गिरफ्तार गरिएको छ ।

५. ​जनकपुरमा आम हडतालका क्रममा निस्किएको जुलुशमाथि पछाडिबाट फायर चलाइएको छ । केन्द्रीय कमिटी सदस्य रामचन्द्र झाको टाउकोमा तीन ठाउँमा गम्भीर चोट लागेको छ भने स्थायी कमिटी सदस्य मात्रिका यादवको खुट्टामा चोट लागेको छ । प्रहरीको प्रहारबाट काशिराम यादवको टाउको र उमेश साहको हात र छातीमा गम्भीर चोट लागेको छ । १० जना कार्यकर्तालाई घाइते बनाइएको छ । त्यहाँ १२ जनालाई गिरफ्तार गरिएको छ ।

६. ​वीरगञ्जमा रामबाबु बैठा, रहबर अन्सारी, मनोज चौधरी, प्रभाकर गुप्ता लगायतका ३५ जना नेता–कार्यकर्तालाई गिरफ्तार गरिएको छ ।

७. ​सिरहामा विवेक परियार, विराट मण्डल लगायतका नेता–कार्यकर्तालाई गिरफ्तार गरिएको छ ।

८.​बाराबाट मुकेश शाह, जवाहिर अन्सारी, हरिओम शाह, राजेश पटेलसहित ६ जना नेताहरुलाई गिरफ्तार गरिएको छ ।

९.​विराटनगरमा पारुल क्षेत्रीसहित ७ जना नेता–कार्यकर्तालाई गिरफ्तार गरिएको छ भने धरानमा तीन जनालाई गिरफ्तार गरिएको छ ।

१०. ​कास्कीमा विनायक तिमिल्सेनालाई गिरफ्तार गरिएको छ ।