वीरगंज। देशको प्रमुख भन्सार नाका वीरगंजबाट पछिल्लो ६ महिनाको अवधिमा १९ अर्ब ५३ करोड ९० लाख ९७ हजार मूल्य बराबरको मालसामान निकासी भएको छ । यसमध्ये सबैभन्दा धेरै निकासी भटमासको तेलको भएको भन्सारको तथ्यांकले देखाएको छ।

चालू आर्थिक वर्ष २०७७/७८ को गत साउनदेखि पुस मसान्त सम्म यो मूल्य बराबरको मालसमान निर्यात भएको हो। यो अघिल्लो आर्थिक वर्ष २०७६/०७७ को भन्दा ६.१० प्रतिशतले बढि हो। आव २०७६/०७७ मा १८ अर्ब ४१ करोड ५१ लाख ८९ हजार मूल्यबराबरको मालसामान भारत तथा तेस्रो मुलुकमा निर्यात भएको वीरगंज भन्सारका प्रमुख भन्सार प्रशासक महेश आचार्यले जानकारी दिए ।

चालू आवको पहिलो ६ महिनामा वीरगंज नाकाबाट भटमासको तेल सबैभन्दा बढी भारततर्फ निर्यात भएको वीरगंज भन्सार कार्यालयका प्रमुख भन्सार प्रशासक आचार्यले बताए ।कोरोना महामारीका कारण चालु आर्थिक बर्षको झण्डै ४ महिना वीरगंज नाकाबाट भारततर्फ हुने निकासी समेत प्रभावित भएपनि निकासीमा सकारात्मक वृद्धि देखिएको उनले बताए।

चालू आवको प्रथम ६ महिनामा वीरगंज नाकाबाट मात्रै ११ अर्ब ५५ करोड ८१ लाख ३३ हजार मुल्य बराबरको ७ करोड ८३ लाख ४१ हजार ७ सय २९ किलो भटमासको तेल भारततर्फ निकासी भएको छ। वीरगंज नाकाबाट बारा पर्सा औद्योगिक कोरिडोरका १४ वटा उद्योगले भटमासको तेल निकासी गर्दै आएका छन्। गत आव २०७६/७७ को साउनदेखि पुससम्मको तुलनामा चालू वर्ष निकासी भएको भटमासको तेल मूल्यका आधारमा ३०२ प्रतिशतले बृद्धि भएको वीरगंज भन्सार कार्यालयको तथ्यांकले देखिएको छ ।

पाम आयल निकासी रोकिएपछि स्वदेशी तेल उत्पादकहरू भटमासको तेल निर्यातमा केन्द्रित भएको आचार्यले स्पष्ट पारे। त्यसैगरी वीरगंज नाकाबाट डाबर नेपालले उत्पादन गरेको जुस, दन्तमञ्जन, च्यावनप्राशसहित कपडा, सेन्थेटिक यार्न, स्पोर्टस सुज, उनी गलैंचा, कार्पेट र पिना पनि भारत निकासी हुने मुख्य बस्तु रहेका छन्।

भारततर्फ डाबरको जुस तथा जाम १ अर्ब ६४ करोड ८४ लाख ६० हजार मूल्य बराबरको निर्यात भएको छ भने च्यावनप्राश, त्रिफला, बतिसा ६६ करोड २० लाख १५ हजार मुल्य बराबरको निर्यात भएको छ। डाबर दन्तमन्जन मात्रै ५५ करोड ३० लाख २३ हजारको निर्यात भएको छ भने जमोठ कपडा ६६ करोड ६५ लाख ९५ हजार मूल्य बराबरको निर्यात भएको छ।

५० करोड २ लाख ६२ हजार मुल्य बराबरको सेन्थेटिक यार्न निर्यात भएको छ भने नेपालबाट ४८ करोड ४६ लाख ८२ हजार मुल्य बराबरको स्पोर्ट सुज निर्यात भएको वीरगंज भन्सार कार्यालयको तथ्यांकले देखाएको छ। त्यसैगरी आयुर्वेदिक औषधि, स्टीलका भाँडाकुँडा, कागजका बाकस, सीआर सीट लगायत वस्तु समेत ठूलो परिणाममा भारत तर्फ निर्यात हुने गरेको वीरगंज भन्सारले जनाएको छ ।