काठमाडौं | ललितपुरको च्यासलमा एक महिलालाई लुटेको आरोपमा महानगरीय प्रहरी अपराध महाशाखाले तीन महिलासहित ४ जनालाई पक्राउ गरेको छ। पक्राउ पर्नेहरुमा उदयपुर घर भई ललितपुर च्यासल बस्ने २६ वर्षीय भरत मगर, ताप्लेजुङ डुम्रेसी घर भई लगनखेल बस्ने २८ वर्षीया निर्मला राई, ललितपुर भारदेउकी ३० वर्षीया सुस्मिता डिम्डो र ललितपुर नल्लु घर भई चापागाउँ बस्ने २९ वर्षीया लबिन लामा बल तामाङ्ग रहेका छन्।

उनीहरुले गत पुस १३ गते दिउँसो साढे २ बजे नुवाकोट घर भई च्यासल बस्ने ५७ वर्षीया धनकुमारी ठकुरीलाई लुटेको प्रहरीले जनाएको छ। ठकुरीले उक्त समूहले आफूसँग २ थान सि माला, १ थान पहेंलो पत्थर, १ थान टल्कने धातु र पुराना सिक्का १४ थान लुटेको प्रहरीमा निवेदन दिएकी थिइन्। त्यसपछि उनीहरुलाई उक्त सामग्रीसहित ललितपुर च्यासलबाट पुस २३ गते साँझ साढे ५ बजे पक्राउ गरिएको महाशाखाका एसएसपी दीपक थापाले जानकारी दिए।

उक्त समूहका बारेमा आवश्यक अनुसन्धान भइरहेको प्रहरीले जनाएको छ।