वीरगंज | सरकारको असंवैधानिक कदमका विरुद्ध कांग्रेसकै आह्वानमा सोमबार बसेको कांग्रेस, नेकपाको प्रचण्ड–नेपाल समूह र जनता समाजवादी पार्टीबीचको सहमति थियो–मंगलबार तीनवटै पार्टीको केन्द्रीय समितिको बैठक बस्ने र आन्दोलनको कार्यक्रम बनाउने । संविधानमाथि फरक मत राखेर संशोधनको माग राख्दै आएको जनता समाजवादी पार्टीले मंगलबारै पाँचदिने आन्दोलनका कार्यक्रम घोषणा गरेर आन्दोलन थालिसकेको छ ।

तर, आफूलाई संविधानको जननी दाबी गर्ने कांग्रेस भने संविधानमाथि गम्भीर आक्रमण भएको ठहर गरेर विरोध गर्ने कि नगर्ने भन्ने विवादमा फसेको छ । प्रतिनिधिसभा विघटन गर्ने सरकारको कदमविरुद्ध आन्दोलन गर्ने कि नगर्ने ? कहिले गर्ने ? भन्ने विषयमा जारी केन्द्रीय समितिको बैठकमा बुधबार नेताहरूबीच चर्काचर्की भएको छ ।

मंगलबारै संस्थापन र इतरपक्षका नेताहरूले आन्दोलन गर्ने कि नगर्ने भन्ने विषयमा भिन्नभिन्न मत राखेका थिए । मंगलबारको बैठकमा सभापति शेरबहादुर देउवाले कांग्रेसले अहिले तुरुन्तै सडक प्रदर्शन, आन्दोलन नगरेर अदालत र निर्वाचन आयोगको निर्णय पर्खिनुपर्ने धारणा राखेका थिए ।

तर, वरिष्ठ नेता रामचन्द्र पौडेलको जोडबल बुधबारै आन्दोलनका कार्यक्रम घोषणा गरेर सडकमा उत्रिनुपर्छ भन्नेमा थियो । देउवाको बोलीविरुद्ध पौडेलले चर्को स्वरमै असहमति राखेपछि बैठकमा सहमहामन्त्री डा. प्रकाशशरण महत र केन्द्रीय सदस्य शंकर भण्डारीले देउवाको बचाउ गरे । ‘तपाई वरिष्ठ नेता भन्दैमा सबै तपाईंले भनेको मान्नैपर्छ भन्ने छैन ?’ भण्डारीले पौडेललाई भनेको उद्धृत गर्दै एक नेताले भने ।

लगत्तै केन्द्रीय सदस्य गुरुराज घिमिरेले पौडेलको बचाउ गर्दै प्रतिरोध गरेका थिए । बुधबारको बैठकमा देउवाले १६ पुसमा मेलमिलाप दिवसको समेत अवसर पारेर विरोध कार्यक्रम गर्न सकिने प्रस्ताव मात्रै गरे, त्यसबारे निर्णय नै भएको छैन । तर, बैठककै बीचमा प्रवक्ता विश्वप्रकाश शर्माले पुस १६ गते मेलमिलाप दिवसको समेत सन्दर्भ पारेर विरोधको कार्यक्रम गर्ने जानकारी दिए ।

बैठकपछि पार्टीका मुख्यसचिव कृष्णप्रसाद पौडेलले जारी गरेको प्रेस विज्ञप्तिमा भने १६ पुसमा सरकारको विरोध कार्यक्रम नखुलाई देशभरि मेलमिलाप दिवस मनाउने निर्णय भएको जानकारी दिएका छन् ।

बैठकपछि बाहिरिएका एक केन्द्रीय सदस्यले १६ पुसमा कांग्रेसले विरोध प्रदर्शन गर्ने निर्णय गरेको सुन्दा आफैँ आश्चर्य माने । ‘यसबारे कुनै निर्णय नै भएको छैन, छलफल मात्रै भएको हो, यही विषयमा त धेरै विवाद भयो,’ ती नेताले भने ।

प्रवक्ता शर्माले भने बुधबारको बैठक स्थगित भइसकेपछि ट्विट गर्दै आन्दोलनका कार्यक्रमबारे बिहीबार बस्ने बैठकले निर्णय लिने बताएका छन् । आन्दोलन गर्ने कि नगर्ने ? वा कसरी गर्ने ? भन्ने विषयमा मंगलबार र बुधबार बोल्ने नेताहरूको बोलीमा एकमत छैन ।

वरिष्ठ नेता पौडेलले प्रचण्ड र नेपालसँग वा अरूसँग मिलेर भए पनि सडक प्रदर्शनमा निस्किनुपर्नेमा जोड दिएका छन् । तर, उनीनिकट मानिने नेता महेश आचार्यले कांग्रेस एक्लैले सरकारको असंवैधानिक कदमविरुद्ध आन्दोलन गर्नुपर्ने धारणा राखेका छन् । केन्द्रीय सदस्य एनपी साउदले आन्दोलनको सट्टा चुनावको तयारीमा लाग्नुपर्ने वक्तव्य दिएका छन् ।

बुधबार बोल्ने नेता गगन थापाले चुनावबारे छलफल गर्नुपर्ने आवश्यकता नै नभएको टिप्पणी गरे । उनले सडक आन्दोलनमा उत्रिन ढिला भएको र छिटो निर्णय गरेर सडकमा जानुपर्नेमा जोड दिए । नेता डा. रामशरण महत र बलबहादुर केसीको जोड पनि आन्दोलनकै विषयमा थियो । तर, संस्थापन पक्ष भने अहिल्यै आन्दोलन वा विरोधका कार्यक्रम बनाएर सडकमा जाने पक्षमा स्पष्ट देखिएको छैन ।