वीरगञ्ज । संसद् विघटनकाे विरोधमा जनता समाजवादी पार्टी (जसपा) पर्साले वीरगञ्जमा विरोध प्रदर्शन गरेको छ । प्रधानमन्त्री केपी शर्मा ओली र राष्ट्रपति विद्यादेवी भण्डारीले आइतबार असंवैधानिक तरिका गरेको संसद् विघटनको विरोधमा जसपाका नेताहरुले वीरगञ्जको घण्टाघर चोकमा नाराबाजी गर्दै प्रदर्शन गरेका हुन् ।

जसपाबाट निर्वाचित प्रतिनिधिसभा सदस्य लक्षमणलाल कर्णको नेतृत्वमा जसपा आबद्ध नेताहरुले टायर बालेर प्रदर्शन गर्न खाेज्दा प्रहरीले हस्तक्षेप समेत गरेकाे थियाे ।प्रदर्शन पश्चात कोणसभालाई सम्बोधन गर्दै लक्ष्मणलाल कर्णले प्रधानमन्त्री केपी ओलीले संसद् विघटन गरेर लोकतन्त्रको हरण र संविधानको धज्जी उडाएको आरोप लगाए ।

उनले विभिन्न आन्दोलनले बलिदानी दिएर जनताले लडेर ल्याएको लोकतन्त्र र संविधानमाथि प्रधानमन्त्री ओलीले प्रहार गरेको बताए ।प्रदर्शनमा जसपा नेता शिव पटेल, नेजामुदिन सम्मानी, ओमेप्रकाश सर्राफ, जगदिश पटेल, उमेश सहनीलगायकाे सहभागिता रहेकाे थियाे ।