बीरगन्ज । साढे २३ किलो सुनका मालिक नभेटिएपछि सुन लिलामी तयारी गरिएको छ । बीरगन्ज महानगरपालिका वडा नं ५ रेशमकोठीस्थित गणेश अपार्टमेन्टमा फेला परेको सुनका मालिक नभेटिएपछि सुन लिलामी गर्न लागिएको हो ।

ज्लिला प्रहरी कार्यालय पर्साको अनुसन्धानमा सुनका मालिक नभेटिएपछि प्रहरीले उक्त सुनलाई राजश्व अनुसन्धान विभागको पथलैयास्थित कार्यालयमा बुझाईदिएको छ । विभागले सुनलाई लिलाम विक्री गर्ने तयारी गरेको छ । विक्रीबाट आएको रकम राज्यकोषमा जम्मा हुनेछ ।

गत मंसिर १ गते जिल्ला प्रहरी कार्यालय, पर्सा र इलाका प्रहरी कार्यालय, विर्ताको संयुक्त टोलीले छापा हानेर २२ केजी ५७६ ग्राम सुनका बिस्कुटहरु, ५७६ ग्राम सुनका गरगहना र दुई केजी २ सय ६२ ग्राम चाँदीको गहना तथा भाडाकुडा बरामद गरेको थियो ।

पर्साकी प्रहरी उपरिक्षक गंगा पन्तले तत्कालीन समयमा सुन मालिक नभेटिएपछि राजश्वमा बुझाइएको जानकारी गराईन् । त्यसवेला बरामद सुन भारतीय नागरिक अशोक सिन्हाको भएको बताइएको थियो ।

अपार्टमेन्टमा केही समयअघिसम्म उनी बसेकाले सिन्हाको सुन भएको आशंका गरिएको थियो ।