वीरगन्ज | वीरगन्जका व्यवसायी सुनील खेतानको एक अर्ब रुपैयाँ लगानीमा वीरगन्ज–१४ बहुअरीमा हिमाल वाटरपार्क एण्ड भिलेज रिसोर्ट सञ्चालनमा आएको हो। प्रदेश न . २ मै एक मात्र पाँचतारे रिसोर्ट वीरगन्जमा सञ्चालनमा आए पछि पर्यटक र स्वदेशी पाहुनालाई वीरगन्ज बसाई अब सहज हुने भएको छ।भारतको चर्चित होटल ब्रान्ड क्लार्कको व्यवस्थापकीय जिम्मेवारी लिएको रिसोर्टमा ६० वटा आरामदायी कोठा, १५ सयदेखि २ हजार व्यक्ति अट्न सक्ने कन्भेन्सन हल, डेढ सयदेखि ३ सयजना अट्ने चारवटा व्यवस्थित सभा हल, स्वीमिङ पुल, क्यासिनो, ओपेन एयर थियटर पार्क, ओपेन एयर किचेन, पार्किङ्ग स्थल, बगैंचा लगायत संरचना निर्माण गरिएको छ।

हाल रिसोर्टमा जन्मदिन, वैवाहिक वर्षगाँठ, वैवाहिक कार्यक्रमको बुकिङ खुला गरिएकोमा एक सातामा ५ वटा सम्म कार्यक्रम सम्पन्न भएको संचालक खेतानले बताए। व्यवस्थापकीय पक्षको जिम्मा लिएको क्लार्कले १५ जना कर्मचारी नियुक्त गरेको छ भने रिसोर्टले नेपाली ५० जनालाई प्रत्यक्ष रोजगार दिने प्रारम्भिक चरणको तयारी थालेको उनको भनाइ छ।३ वर्षअघिदेखि निर्माण सुरु गरिएको यो रिसोर्ट दुई बिघामा फैलिएको सञ्चालक खेतान बताउँछन्। नारायणी सिँचाइ डिभिजन नं ५ गण्डक बहुअरीभन्दा ७ सय मिटरपूर्व अवस्थित रिसोर्टले एक सातादेखि कन्भेन्सन हल र रेस्टुरेन्ट सञ्चालनमा ल्याएको छ।

वीरगन्ज उद्योग वाणिज्य सङ्घका उपाध्यक्षसमेत रहेका खेतानले यसअघि कागज उद्योग र एफ एम रेडियोमा लगानी गरेका थिए। वीरगन्जमा सुविधा सम्पन्न रिसोर्टको आवश्यकता महसुस गर्दै भारतको क्लार्क ब्रान्डले लखनउको पाँच तारे होटल अवधबाट जारी राखेको होटल फ्रेन्चाइजसँग नेपालमा पहिलो अन्तर्राष्ट्रिय चेन होटलको रूपमा हिमाल वाटर पार्क एन्ड भिलेज रिसोर्टलाई अनुबन्धित गरिएको उनको तर्क छ।सम्पूर्ण सञ्चालनको जिम्मा चर्चित ब्रान्ड क्लार्कलाई नै दिने गरी होटलको गुणस्तरीयमा ध्यान दिइएको खेतानले बताए। क्लार्कको पहिलो विदेशी प्रडक्ट भएकाले पनि अन्तर्राष्ट्रियस्तरको रिसोर्टको सुविधाले नेपाली ग्राहक तथा देश घुम्न आउने पर्यटकले सेवा सुविधाबाट फाइदा लिन सक्ने उनको आशा छ।

वीरगन्जमा अन्तर्राष्ट्रिय मापदण्डअन्तर्गत सञ्चालन हुने दियालो लड्र्स प्लाजापछि यो दोस्रो लगानीको होटल पार्क हो। दियालोमा भारतीय फ्रेन्चाइज लड्र्स प्लाजाले प्रबन्धन हेर्दै आएको छ। जसमा वीरगन्जका उद्योगी तथा नेता अनिल रुँगटाको लगानी छ। उक्त होटल चार तारे मापदण्डमा एक वर्षदेखि सञ्चालनमा छ।तीन वर्षको अथक प्रयासपछि अहिले निर्माणको अन्तिम चरणमा हिमाल वाटर पार्क एण्ड भिलेज रिसोर्टमा ६० वटा कोठा सहितको होटल ब्लकको काम जारी गरिएको व्यवस्थापकको भनाइ छ।

आगामी ८ महिनामा होटल पूर्ण क्षमतामा सञ्चालन गर्न सकिने खेतानले बताए। उनका अनुसार होटल ब्लक बनेपछि रिसोर्ट परिसरमा चार वटा एक्जुकेटिभ स्विट्स, आठवटा एक्जुकेटिभ कोठा, आठ वटा स्विट्स, २६ वटा किङ र फुल फ्लेज्ड रेस्टुरेन्ट सञ्चालनमा आउनेछ। पूर्ण रुपमा रिसोर्ट सञ्चालनमा आएपछि साढे ४ देखि ७ हजारसम्ममा आरामदायी कोठा बुक सुरु गर्ने रिसोर्टको तयारी रहेको संचालक खेतानले बताए।ग्लोबल आइएमई बैंकले ऋण उपलब्ध गराएको रिसोर्टले काठमाडौंपछि वीरगन्जमा स्तरीय रिसोर्ट सञ्चालनमा ल्याएको संचालकको दाबी छ। प्रदेश २ मा बिहार, उत्तरप्रदेश तथा अन्य राज्यबाट वैवाहिक कार्यक्रम तथा अन्य औद्योगिक प्रयोजनका लागि आउने पर्यटकलाई पनि लक्ष्य गरी होटल क्लार्क पार्क निर्माण गरिएको संचालक खेतानले बताए।