वीरगंज | सरकारले कोरोना भाइरस (कोभिड–१९) विरुद्धको खोपका लागि खोप उत्पादन गरिरहेका देशलाई कुटनीतिक नोट लेखेको छ। सरकारले कोभिड विरुद्धको खोप निःशुल्क उपलब्ध गराउन कुटनीतिक नोट लेखेको बताइएको छ।

कोभिड–१९ विरुद्धको खोप नेपालमा सहज रुपमा ल्याउनका लागि सरकारले खोप उत्पादक कम्पनीसँग खोप खरिदका लागि दाताका विषयमा पनि छलफल चलाएको छ। दाताहरुसँग सहयोग माग्दै धेरै मात्रामा खोप नेपाल भित्र्याउन छलफल चलाइएको स्वास्थ्य तथा जनसंख्या मन्त्रालयका एक अधिकारीले जानकारी दिए।

स्वास्थ्य तथा जनसंख्या मन्त्रालयका अनुसार कोभिड खोप उत्पादन गरिरहेका भारत, चीन, रसियालगायतका देशलाई कुटनीतिक नोट लेखिएको बताइएको छ।स्वास्थ्य मन्त्रालयका एक कर्मचारीका अनुसार कोभ्याक्स फ्यासिलिटी मार्फत उपलब्ध हुने २० प्रतिशत खोपबाहेक अन्य खोपका लागि दाता खोज्ने काम भइरहेको छ।

विश्व स्वास्थ्य संगठन, गाभीलगायतका संस्थाको समन्वयमा कोभिड खोप धनी गरिब सबै देशमा सहज रुपमा उपलब्ध गराउन कोभ्याक्स फ्यासिलिटी बनाइएको हो।

सरकारले कोभ्याक्सले निशुल्क उपलब्ध गराउने २० प्रतिशत खोपबाहेक अन्य खोप आफै खरीद गर्ने निर्णय गरिसकेको बताइएको छ। त्यसका लागि ४८ अर्ब रुपैयाँ विनियोजन गरेको समेत बताइएको छ। कोभ्याक्सले नेपाललाई २० प्रतिशत खोप निशुल्क उपलब्ध गराउने जनाइसेको स्वास्थ्य मन्त्रालयद््वारा गठित कोभिड भ्यासिक्स प्राविधिक सल्लाहकार समितिले जनाएको छ।

समितिका अनुसार कोभ्याक्सले पहिलो चरणमा ३ प्रतिशत खोप उपलब्ध गराउने र त्यसपछि बाँकि खोप उपलब्ध गराउने बताएको छ।प्राविधिक समितिले कोभिड खोप पाउने व्यक्तिहरुको जोखिमका आधारमा समेत वर्गिकरण गरिसकेको छ।