वीरगंज। आउँदो साता नेपाली बजारमा आईफोन ट्वेल्भ सिरिजका दुई मोडल सार्वजनिक हुने भएको छ । नेपालका लागि आईफोनको आधिकारिक विक्रेता जेननेक्स्ट प्रालिले यी फोन बजारमा उपलब्ध गराउने भएको हो ।
जेननेक्स्टका प्रवन्ध निर्देशक पवन भिमसरियाका अनुसार मंसिर २६ गते आईफोन १२ अन्तर्गतका दुई फोन सार्वजनिक हुनेछन् । यसमध्ये आईफोन ट्वेल्भ र आईफोन ट्वेल्भ प्रो सार्वजनिक हुनेछ ।
भिमसरियाका अनुसार यी दुई फाेन सार्वजनिक भएकाे १० दिनपछि आईफोन ट्वेल्भ प्रो म्याक्स र आईफोन ट्वेल्भ मिनी नेपाली बजारमा उपलब्ध हुनेछ ।
यी स्मार्टफोन तीन फरक भेरियन्टमा बजारमा उपलब्ध हुनेछ । जसमा आईफोन ट्वेल्भ प्रो १२८, २५६ र ५१२ जीबी भेरियन्टमा उपलब्ध हुनेछ । यसको बजार मूल्य क्रमशः एक लाख ७५ हजार, एक लाख ९३ हजार र दईु लाख २७ हजारको हाराहारीमा पर्नेछ ।
त्यस्तै आईफोन ट्वेल्भ ६४, १२८ र २५६ जीबी भेरियन्टमा उपलब्ध हुनेछ । यसको बजार मूल्य क्रमशः एक लाख ३४ हजार, एक लाख ४२ हजार र एक लाख ५८ हजार रूपैयाँको हाराहारी पर्नेछ ।
यी माेडलमा एक वर्षको वारेन्टी रहेको छ । जसमा एक वर्षभित्र केही बिग्रिएको खण्डमा बनाएर दिनुका सट्टा रिप्लेसमेन्टको सुविधा उपलब्ध गराइनेछ ।
त्यस्तै उक्त फोनका लागि कम्पनीले विभिन्न इन्स्योरेन्स कम्पनीसँगको सहकार्यमा इन्स्योरेन्स सेवा पनि उपलब्ध गराउने जनाएको छ । जसमा पानीले भिजेको र हाइभोल्टेजले भएको ड्यामेजबाहेक सम्पूण कुरालाई समेट्ने उल्लेख गरिएको छ ।
यदि फोन फुटेको खण्डमा, हराएको खण्डमा पुलिस रिपोर्ट उपलब्ध गराएको खण्डमा उक्त इन्स्योरेन्सको कभरेज गर्नेछ । भौतिक रुपमा केही बिग्रिएको खण्डमा एक वर्षभित्र नयाँ फोन प्रदान गरिनेछ । तर, त्यसका लागि भ्याट बिलसहित आधिकारक स्टोरबाट किन्नुपर्नेछ ।
साथै कम्पनीले ग्राहकको सहजताको लागि ईएमआई सेवा पनि उपलब्ध गराउने भएको छ । यसअन्तर्गत विभिन्न बैंकसँगको सहकार्यमा शुन्य ब्याजदरमा किस्ताबन्दीमा आईफोन किन्न सकिन्छ ।
