वीरगंज । मोबाइल फोन ईम्पोटर्स एशोसियसनले मोबाइल सेटको अवैध विक्रि वितरणको पूर्ण अन्त्य गर्न व्यवसायीहरुलाई आग्रह गरेका छन् । यस्तो अवैध विक्रि वितरणको कारण मोबाइल फोन व्यवसाय मात्र नभई राष्ट्रको समग्र अर्थतन्त्रलाई नकारात्मक प्रभाव पारेको एशोसियसनले बताएको छ ।

विभिन्न मुलुकबाट चोरी पैठारी गरी भित्राईएका मोबाइल फोनको अवैधानिक बजार नेपालमा तिब्र रुपमा बढिरहेको छ जसले गर्दा सरकारको राजश्व वापत संकलन गरिने ठुलो धनराशी गुमिरहेको छ । मोबाइल फोन व्यवसायको स्वस्थ्य र मर्यार्दित विकासमा अवरोध खडा भएको छ । यति मात्र नभई अवैध (ग्रे) मोबाइल सेटको आइएमइ नम्बर रजिस्टर नहुने भएकोले यसको प्रयोग अपराधिक क्रियाकलापमा पनि हुन सक्ने प्रवल सम्भावना रहेको एशोसियसनले जनाएको छ ।

यी गम्भीर कारणहरुले गर्दा मोबाइल सेटको अवैध बजारको तत्काल पूर्णरुपमा अन्त्य गर्न हामी सम्पूर्ण मोबाइल फोन व्यवसायी, उपभोक्ता एवं सरकारको कर्तव्य हुन आउँदछ । मोबाइल फोन ईम्पोटर्स एशोसियसन र नेपाल मोबाइल वितरक सघंले देशभरका मोबाइल सेट विक्रेताहरूलाई अवैध (ग्रे) कारोबार नगर्न गत श्रावण १ बाट नै अनुरोध गरेका थियो । तर सो सुचनाको अवज्ञा गर्ने गरेको पाइएकोले उक्त व्यवसायीहरुलाई नियम संगत कार्वाहीको लागी  एशोसियसनले सम्बन्धित निकायलाई अनुरोध पनि गरेको छ ।

यसै गरी मोबाइल फोन आयातकर्ताहरुको छाता संगंठन मोबाइल फोन ईम्पोटर्स एशोसियसनले सरकारलाई चोरी पैठारी सम्बन्धी कानुनलाई कडाईका साथ लागु गर्न अनुरोधका साथै मोबाइल फोन विक्रेताहरुलाई पनि कानुनी दायरमा बसी स्वस्थ व्यवसाय गर्न आव्हान गरेको छ । मोबाइल फोन उपभोक्ताहरुलाई पनि फोन खरिद गर्दा सचेत भई एमपिआइए अंकित होलोग्राम स्टिकर भएको फोन मात्र खरिद गर्न र पसलको आधिकारिक विल लिन अनुरोध गरेको छ ।