वीरगंज। सुख्खायाम सुरु भएसँगै तिहारमा देशभर आगलागीका घटना ह्वात्तै बढेका छन्। आइतबार एकैदिन देशभर ४२ स्थानम आगलागीका घटना भएका छन्।

राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार आइतबार भएका आगलागीका घटनाले साढे २ करोड रुपैयाँ भन्दा बढीको क्षति गरेको छ। आइतबार भएका आगलागीमा परी एक जनाको मृत्यु भएको छ भने चार जना घाइते भएका छन्

शनिबार लक्ष्मीपुजाको दिन देशभर ३९ स्थानमा आगलागी भएको थियो। लक्ष्मीपुजाको दिन भएको आगलागीका घटनामा एक जनाको मृत्यु भएको थियो भने पाँच जना घाइते भएका थिए। उक्त दिन आगलागीले दुई करोड रुपैयाँ भन्दा बढीको क्षति गरेको प्राधिकरणले जनाएको छ।

लक्ष्मीपुजाको दिन भएका आगलागीका घटनामध्ये १३ वटा घटना लक्ष्मीपुजा गर्दा बालिएको दियोबाट भएको थियो। गत शुक्रबार देशका १३ स्थानमा आगलागीका घटना रकेर्ड गरिएको थियो, जहाँ एकजनाको मृत्यु भएको थियो। बिहीबार देशका १५ स्थानमा आगलागी भएको थियो। ती आगलागीका घटनामा एक जना घाइते भएका थिए।

प्राधिकरणका अनुसार पछिल्ल चार दिनमा देशका १०९ स्थानमा आगलागी भएको छ भने ती आगालागीका घटनाले साढे ५ करोड रुपैयाँ भन्दा बढीको क्षति गरेको छ। पछिल्लो चार दिनमा आगलागीका घटनामा परी तीन जनाको मृत्यु र १० जना घाइते भएका छन्।

आइतबार झापाको कमला गाउँपालिका–२ थापागाउँस्थित एक घरमा मैनबत्तिबाट आगो सल्किन गई आगलागी हुँदा ७ वर्षीय बालिकाको घटनास्थलमै ज्यान गएको छ। उक्त घटनामा एक जना घाइते भएका छन् भने १५ लाख रुपैयाँ बराबरको आर्थिक क्षति भएको प्राधिकरणले जनाएको छ।

कैलालीको बर्दगोरिया गाउँपालिका–४ नौनिया स्थित एक गोठमा बालेको मैनबत्तिबाट आगलागी हुँदा एक जना घाइते भएका छन्। सप्तरीको डाक्नेश्वरी नगरपालिका–६ विष्णुपुर स्थित एक गोठमा बालेको घुरबाट आगलागी हुँद्या एक जना घाइते भएका छन्।

धनुषाको नगराईन नगरपालिका–३ फुलगामा स्थित एक घरको आँगनमा खरको आगो बाली ताप्ने क्रममा अचानक साडीमा आगो सक्लिन जाँदा एक जना महिला घाईते भएकी छन्।

उदयपुरको कटारी नगरपालिका–१० सल्लेस्थित एक घरमा अचानक आगलागी हुँदा ४३ लाख ६२ हजार ४०० रुपैयाँ बराबरको क्षति भएको प्राधिकरणको विज्ञप्तिमा उल्लेख छ। दोलखाको जिरी नगरपालिका–९ उर्लनि स्थित एक घरमा करेन्ट सर्ट भई आगलागी हुँदा ४० लाख रुपैयाँ बराबरको क्षति भएको छ।

मोरङको बिराटनगर महानगरपालिका–१० ट्राफिक चोक नजिक उक फेन्सी पसलमा आइतबार आगलागी हुँदा ६० लाख रुपैयाँ बराबरको क्षति भएको प्राधिकरणले जनाएको छ।

कपिलवस्तुको मायादेवी गाउँपालिका–४ चाकरगौडा स्थित बालाजी अटो पार्ट एण्ड सर्भिस सेन्टरमा विद्युत सर्ट भई आगलागी हुँदा १२ लाख रुपैयाँ बराबरको क्षति भएको छ।