वीरगंज | भाइरसको महामारी नियन्त्रण गर्न तेस्रो चरणको तयारी थालेको छ।बिहीबार मुख्यमन्त्री तथा मन्त्रीपरिषद्को कार्यालयमा कोरोनाको वर्तमान अवस्था, विगतका कामकाजको समीक्षा र आगामी रणनीतिबारे छलफल गर्न प्रादेशिक कोरोना संकट व्यवस्थान समिति (पिसिसिएमसी)को बैठक बसेको थियो।

उक्त बैठकले कोरोना भाइरसको महामारीविरूद्ध तेस्रो चरणको तयारीमा पुगेको निष्कर्ष निकालेको हो।तयारी स्वरूप पचास हजार भिटिएम र रिएजेन्ट खरिद गरेको सामाजिक विकास मन्त्रालय आपूर्ति महाशाखाका निर्देशक डा. प्रमोद यादवले जानकारी दिए।

त्यस्तै प्रदेशका चार जिल्लामा पिसिआर ल्याब सञ्चालनमा आउन बाँकी छ। उनका अनुसार ती जिल्लामा यसै सातादेखि ल्याब सञ्चालनमा ल्याउने तयारी पूरा भएको हो।बैठकले अस्पतालका उपचार प्रणालीलाई थप सुदृढ बनाउन उच्च निर्भरता कक्ष (एचडियू) निर्माण गर्ने निर्णय गरेको छ।

प्रदेशभरिका ६ वटा अस्पतालमा २५ बेडका दरले जम्मा १५० बेडको एचडियू निर्माण गर्न लागेको हो।साथै, प्रदेश सरकारको आर्थिक सहयोगमा विभिन्न अस्पतालहरूले खरिद गरेको भेन्टिलेटरहरूलाई अतिशिघ्र सञ्चालनमा ल्याउन आवश्यक दक्ष जनशक्ति व्यवस्थापन गर्ने समेत बैठकले निर्णय गरेको छ।

मुख्यमन्त्री लालबाबु राउतको अध्यक्षतामा सम्पन्न बैठकले निकट भविष्यमा आउन लागेको कोरोनाको भ्याक्सिनलाई व्यवस्थापन गर्न तीन सदस्यीय भ्याक्सिन व्यवस्थापन समिति गठन समेत गरेको छ।

संक्रामक रोग विशेषज्ञ एवं विज्ञ समूहका सदस्य डा. गरिबनाथ ठाकुरको संयोजकत्वमा गठित उक्त समितिमा आपूर्ति महाशाखाका निर्देशक डा. प्रमोद यादव र स्वास्थ्य निर्देशनालयका निर्देशक विजय झालाई राखिएको छ।