वीरगञ्ज । कोरोना संक्रमणको जोखिम न्यूनीकरण तथा उपचार व्यवस्थापनका लागि करिब ७ अर्ब बिनियोजन गरिएको स्वास्थ्य तथा जनसंख्या मन्त्रालयले जनाएको छ । चालु आर्थिक वर्षको २०७७-०७८ मा कोरोना भाइरस संक्रमण रोकथाम, नियन्त्रण र उपचारका लागि ६ अर्ब ८१ करोड ५९ लाख ६ हजार रुपैया बिनियोजन भएको प्रवक्ता डा. जागेश्वर गौतमले जानकारी दिए ।

उनका अनुसार मन्त्रालयको हाइ डिपेन्डेन्सी युनिटका लागि पठाइएको ३ अर्ब २५ करोड रुपैयाँसमेत समावेश भएको छ । प्रयोगशाला परीक्षण तथा व्यवस्थापन शिर्षकमा हालसम्म १ अर्ब १२ करोड ४० लाख रकम निकासा भएको मन्त्रालयले जनाएको छ ।

उनका अनुसार संक्रमित व्यवस्थापन कट्याक्ट ट्रेसिङ,जोखिम भत्ताका लागि १ अर्ब १४ करोड २९ लाख ६ हजार निकासा भएको छ । आईसीयू, भेन्टिलेटर र औषधि सुदृढीकरणका लागि १ अर्ब २९ करोड ९० लाख रुयैयाँ निकासा भएको प्रवक्ता डा. गौतमले बताए ।

उनका अनुसार कोरोनाको उपचार गर्न सूचीकृत गरेका सरकारी प्रयोगशाला र सरकारी अस्पतालमा कोरोना भाइरसको लक्षण र चिन्ह देखिएका विरामीको निशुल्क उपचार गरिने छ । तर कुनै पनि बिमा कम्पनीबाट बिमा गरेको भएमा उपचार सोही रकमबाट कट्टा गरिने उनले जानकारी दिए ।