वीरगञ्ज। वीरगञ्जस्थित ओम अस्पतालको लापरवाहीका कारण एक जना नवजात शिशुको मृत्यु भएको छ ।अस्पतालमा चिक्तिसकहरुले उपचारमा गरेको लापरवाहीका कारण १० दिने शिशुको मृत्यु भएको परिवारका सदस्यहरुले आरोप लगाएका हुन् ।

वीरगञ्ज महानगरपालिका वडा नम्बर ३ छपकैयास्थित ओम हस्पिटलका चिकित्सकहरुले सामान्य अवस्थामा रहेका शिशुको उपचारमा गरेको लापरवाहीका कारण उसको मृत्यु भएको उनकी आमा रुक्सान खानले आरोप लगाएकी छन् ।

छोराको शरीरमा सानो घाउ भएपछि पर्साको जगरनाथपुर गाउँपालिका वडा नम्बर ४ बस्ने रुक्सानाले उपचारका लागि ओम हस्पिटल भर्ना गराएकी थिइन । तर उनको उपचारमा संलग्न चिक्तिसक डा. मनोज गुप्ताले उपचारमा लापरवाही गर्दा छोराको मृत्यु भएको रुक्सानाले बताइन ।

‘छोराको शरीरमा एउटा सानो घाउ मात्र थियो । अरु कुनै समस्या थिएन,’ रुक्सानाले भनिन, ‘तर डा. मनोज गुप्ताले मेरो छोरालाई मारिदिए । उनले उपचारमा लापरवाही गर्दा मेरो छोराको मृत्यु भएको हो ।’यस विषयमा अस्पताल प्रशासनसँग सम्पर्क गर्न खोज्दा सम्पर्क स्थापित हुन सकेन ।