उक्त परीक्षामा सामेल हुन विद्यार्थीले ५०० रुपैयाँ थप दस्तुर बुझाउनुपर्ने विद्यालयले नियम बनाएका हुन्। यसअघि गत वर्ष नै परीक्षा दस्तुरबापत प्रतिविद्यार्थी ६०० रुपैयाँ असुल गरिएको थियो।
कोभिड-१९ का कारण विद्यालयमा गएर अध्ययन गर्न नपाएका विद्यार्थीलाई दोहोरो दस्तुर लिनु गैरकानुनी भएको र तत्काल निर्णय फिर्ता लिन विद्यार्थी अगुवाले माग गरेका छन्। पहिले नै परीक्षा दस्तुर लिइएकामा फेरि ५०० रुपैयाँ थप गर्नु अन्याय हुने भएकाले निर्णय पुनरावलोकन गर्न अनेरास्ववियुका सर्लाही संयोजक विवेक मैनालीले माग गरे। विद्यार्थीलाई दोहोरो मार पार्ने काम भए चुप लागेर नबस्ने मैनालीले चेतावनीसमेत दिए।
राष्ट्रिय परीक्षा बोर्डले कोभिड-१९ का कारण परीक्षा सञ्चालन खर्च पठाउन नसकेपछि विद्यालयले विद्यार्थीसँग उठाउन लागेको बुझिएको उनको भनाइ छ। शिक्षा विकास तथा समन्वय इकाइ सर्लाहीका अनुसार जिल्लाका २० वटै स्थानीय निकायका शिक्षा शाखा प्रमुख, पेशागत संगठनका प्रमुख र विद्यालयका प्रधानाध्यापकबीच कात्तिक २१ देखि कक्षा ११ को परीक्षा शुरु गर्ने सहमति भएको हो।
राष्ट्रिय परीक्षा बोर्ड जनकपुरका प्रकाश काफ्लेका अनुसार गत वर्ष लिइएको दस्तुर बापतको ६०० रुपैयाँमध्ये २०० प्रवेशपत्र, प्राविधिक व्यवस्थापन र अन्य खर्चका लागि उपयोग हुने र बाँकी ४०० रुपैयाँ कक्षा १२ को परीक्षामा मिलान गरिदिने सहमति भएको छ। बोर्डले यस्तो व्यवस्था गरेको सूचना नै प्रकाशित गरेको छ। बोर्डले सहमति जनाएको भए पनि ५०० रुपैयाँको सट्टा ४०० रुपैयाँ मात्रै लिइनुपर्ने मैनालीको तर्क छ। विद्यार्थीबाट करीब चार लाख रुपैयाँ असुल गरी हिनामिना गर्न नपाइने उनले बताए।
परीक्षा बोर्डले अहिले बुझाएको ५०० रुपैयाँबाट नियमित तर्फका विद्यार्थीहरुको कक्षा १२ को परीक्षा आवेदन शुल्कमा मिलान गरिने र आंशिक तर्फका विद्यार्थीको ट्रान्स्क्रिप्ट, प्रोभिज्नल सर्टिफिकेट र माइग्रेसनमा लाग्ने एक हजार ४५० मध्येको शुल्कमा मिलान गरी एक हजार १०० मात्र शुल्क लाग्ने गरी साउन २३ मा शुल्क मिलान गरिएको बोर्डका काफ्लेले बताए।
पहिले बोर्डले लिएको शुल्क कक्षा १२ मा मिलान हुने निर्देशन भएकाले सोहीअनुसार गरिएको फौजसिंह माविका शिक्षक केदार काफ्लेले बताए। इकाइ प्रमुख रामआधार कुशवाहले बोर्डले कोभिड-१९ का कारण रोकिएको कक्षा ११ को परीक्षा विद्यालय आफैँले सञ्चालन गर्ने कार्यविधि बनाएको बताए। उनका अनुसार परीक्षामा जिल्लाका तीन वटा क्याम्पससहित ६७ वटा मावि रहेकामा अहिले कक्षा ११ को पठनपाठन चलेका ६१ वटा माविहरुमा परीक्षा सञ्चालन हुने र उक्त परीक्षामा पाँच हजार २६१ जना नियमिततर्फ र दुई हजार ६६२ जना आंशिक तर्फका गरी जम्मा सात हजार ९२३ परीक्षार्थीको सहभागिता रहने बोर्डले जनाएको छ। जिल्लामा ४८ सामुदायिक, १६ निजी र तीनवटा क्याम्पस रहेका छन्।
जिल्लामा कक्षा ११ को परीक्षा सबै विद्यालयले एउटै मितिमा सञ्चालन गर्ने सहमति जुटेको छ। बोर्डले कक्षा १२ को परीक्षा मंसिर ९ बाट सञ्चालन गर्ने मिति तोकेको र त्योभन्दा अघि नै कक्षा ११ को परीक्षा सक्न कार्यविधिमा भनिएको कुशवाहले बताए। परीक्षाको मिति तयसँगै विद्यालयले त्यसको तयारी पनि थालिसकेको छ।
