वीरगन्ज । नेपाली फिल्म क्षेत्रमा विगतका केही वर्षदेखि काम गर्दै आएकी एक नायिका (नेपाली फिल्मकी क वर्गकी नायिका) कोरोना महामारीका बीच गत चैतयता प्रायःजसो घरमै हुन्छिन् ।

कोरोना महामारीअघि उनको व्यस्तता निकै थियो । हरेका दिनजसो फिल्म शूटिङ, प्रमोसन, पत्रकार सम्मेलन आदि–आदि ।सामाजिक सञ्जालमा पनि उत्तिकै सक्रिय थिइन् र अहिले पनि छिन् । सामाजिक सञ्जालमा उनको फ्यान फलोअर्स लगभग एक करोडभन्दा बढी छ ।

कोरोना महामारीका कारण घोषित लकडाउनको समयमा उनी घरमै थिइन् । फेसबूक, ट्विटर, इन्स्टाग्राम आदिमा समय बित्ने नै भयो ।

सामाजिक सञ्जाल चलाउने क्रममा एक दिन उनले फेसबूकमा आफ्नो फोटोलाई बिगारेर विभिन्न अश्लील शब्दहरू प्रयोग गरी शेयर गरेको भेटिन् ।

उनी छाँगाबाट खसेजस्तै भइन् । त्यसपछि खोज्दै नांगो फोटोमा उनको टाउको जोडेको तथा भिडियो समेत बनाएको पाइयो ।

त्यसपछि उनले आफन्तको सल्लाहमा साइबर ब्यूरोमा उजुरी दिइन् । साइबर ब्यूरोले प्राविधिक अनुसन्धानका क्रममा ‘ढकारी गाउँपालिका अनलाइन खबर’ र ‘हाम्रो ढकारी गाउँपालिका कार्यालय अछाम’ नामको अनलाइन पेज चलाउने व्यक्ति पत्ता लगायो ।

ती नायिकाको नग्न फोटो राख्ने, ती दुबै पेजमा अश्लील शब्दहरू राख्ने लगायतका काम उनले गर्दै आएको पाइएको साइबर ब्यूरोका प्रमुख वरिष्ठ प्रहरी उपरीक्षक (एसपी) नविन्द्र अर्यालले बताए ।

‘फेजबूक पेज प्रयोगकर्ताले ती नायिकाको फोटोहरू प्रयोग गरेर अश्लील शब्दहरू समेत लेख्ने गरेको पाइएको छ,’ एसएसपी अर्यालले लोकान्तरसँग भने, ‘ती व्यक्तिले फेसबूक पेजमार्फत, सामाजिक सद्भावमा खलल पार्ने, नायिकालाई हैरानी दिने नैतिकताविरुद्धको कार्य गर्ने गरेको पाइएको छ ।’

ब्यूरोका प्रमुख एसएसपी अर्यालका अनुसार ती व्यक्तिले फेसबूक पेजमा ‘…म्यारिज फूल भिडियो’ शीर्षक दिएर अपाच्य शब्द प्रयोग गरेर अश्लील भिडियो समेत पोस्ट गरेका थिए । प्रहरीले अनुसन्धान गर्दै जाँदा अछाम ढकारी गाउँपालिका–५ चैनपुरका किरण क्षेत्री भन्ने किरण बुढाले उक्त पेज सञ्चालन गर्दै आएको पाइएको छ ।

प्रहरीले अनुसन्धान र यथेष्ट प्रमाणपछि उनीविरुद्ध विद्युतीय कारोवार ऐन–२०६३ को दफा ४७ को उपदफा १ बमोजिम बिगो दाबी र कारवाहीको मागसहित जिल्ला अदालत काठमाडौंमा मुद्दा दायर गरेको एसएसपी अर्यालले बताए ।

अभियुक्त किरण बुढा भने अहिले वैदेशिक रोजगारीका क्रममा दुबईमा छन् । किरणले सामाजिक सञ्जालमा अश्लील र अमर्यादित पोष्टहरू दुबईमा बसेर गर्दै आएको पाइएको प्रहरीले जनाएको छ । 

२ महिनामा ६ सय साइबर अपराधका उजुरी

आर्थिक वर्षको शुरूआतको पहिलो २ महिनामा ६ सयभन्दा धेरै अर्थात् ६ सय १३ वटा साइबर अपराधका उजुरी परेका छन् । 

‘पछिल्लो समयमा साइबर अपराधका उजुरीहरू धेरै आइरहेका छन् । आर्थिक वर्षको पहिलो दुई महिनामा ६ उजुरी परेका छन्,’ ब्यूरोका एसएसपी अर्यालले भने, ‘एक महिनामा औसत ३ सयको हाराहारीमा साइबर अपराधका उजुरीहरू आउँछन् ।’

साइबर ब्यूरोको तथ्याङ्कलाई हेर्ने हो भने फेसबूक म्यासेन्जरबाट हुने अपराध धेरै छन् । केही दिन अगाडि मात्रै फेसबूक म्यासेन्जरमा अश्लील फोटो/भिडियो १४ वर्षमुनिका बालबालिकालाई पठाउने एक जनालाई ब्यूरोले कारवाहीको दायरामा ल्याएको थियो ।

यो आर्थिक वर्षको पहिलो २ महिना साउन र भदौमा फेसबूकमा ५ सय ३७ वटा, इमोमा ७ वटा, युट्युबमा १४ वटा, ह्वाट्सएपमा ५ वटा, ट्विटरमा ३ वटा, इन्स्टाग्राममा ६ वटा, टिकटकमा ७ वटा, इमेलमा ४ वटा, इसेवामा ११ वटा र अन्य १७ वटा साइबर अपराध भएको उजुरी परेको ब्यूरोको तथ्याङ्कले देखाएको छ ।

साइबरमा अपराध गर्नेहरूले महिलालाई बढी सताएको देखिन्छ । यो दुई महिनामा परेका ६१३ उजुरीमध्ये ३९१ जना महिला पीडित छन् । पुरुष २४९ जना, १९ जना बालिका र ७ जना बालक पीडित भएको देखिन्छ ।