वीरगन्ज ।  वीरगञ्ज महानगरपालिका कार्यालयले नगरमा सञ्चालित सम्पूर्ण सामुदायिक विद्यालयहरुलाई आइतबारदेखि पठनपाठन सुरु गर्ने निर्देशन दिएपछि विद्यालयहरु सञ्चालनमा आउने भएका हुन् ।

नगर भित्र रहेका निजि विद्यालयहरुले गत महानगरको अनुमति पछि बिहीबारदेखिनै पठनपाठन सुरु गरिसकेका छन् ।

वीरगञ्ज महानगरपालिका कार्यालयमा आइतबार वीरगञ्ज भित्रका सामुदायिक विद्यालयका प्रधानाध्यापक र विद्यालय व्यवस्थापन समितिका अध्यक्षहरु बीच भएको छलफलबाट यस्तो निर्णय भएको नगरप्रमुख विजयकुमार सरावगीले बताए ।

सामुदायिक विद्यालयहरुलाई पनि प्रथम चरणमा निजि झैँ कक्षा ८, ९ र १० तथा सो भन्दामाथिको पठनपाठन भौतिक रुपमै सुरु गर्ने निर्देशन दिएको नगरप्रमुख सरावगीले जानकारी दिए । तर, भौतिक रुपमा कक्षा सञ्चालनका लागि अभिभावक अनुमति लिएर मात्र स्कुल बोलाउन विद्यालय व्यवस्थापन समिति र प्रधानाध्यापकहरुलाई निर्देशन दिएको उनले बताए ।

‘पूर्व तयारी भएको र सक्षम रहेको विद्यालयहरुलाई मंगलबारबाटै कक्षा सूचारु गर्न निर्देशन दिएका छौं,’ नगरप्रमुख सरावगीले भने, ‘बाँकीलाई तयारी गर्न शुक्रबारसम्मको समय दिइएको छ । अगामी आईतबारबाट सम्पूर्णलाई विद्यालय खुल्ने छन् र स्वास्थ्य सुरक्षा मापदण्ड अपनाउँदै पठनपाठन सुरु हुनेछ ।’

यस्तै, लिखित पत्र मार्फत पत्राचार कहिले हुन्छ भन्ने प्रश्नमा मेयर सरावगीले भने ‘सामुदायिक विद्यालय खोल्नेबारे पनि निर्णय आज भयो, भोलिसम्ममा सबै विद्यालयहरुलाई विद्यालय खोल्ने निर्देशनबारे लिखित रुपमै पत्रचार हुनेछ ।’

विश्व स्वास्थ्य संगठन र नेपाल सरकारले निर्धारण गरेको स्वास्थ्य सुरक्षा मापदण्डलाई कडा रुपले पालना गर्नुपर्ने विद्यालयहरुलाई निर्देशन दिइएको महागरका शिक्षा महाशाखा प्रमुख अरविन्द लाल कर्णले बताए । ‘साबुन पानीले हात धुने, मास्क, पञ्जा, सेनीटाईजरको व्यवस्थापन गर्न, एउटा बेन्चमा बढीमा दुई जना विद्यार्थी राख्दै भौतिक दुरी जस्ता मापदण्ड पालन गर्न कडा रुपले निर्देशन दिएका छौं,’ उनले भने ।

मापदण्ड पूरा गर्ने क्रममा आवश्यक पर्ने थर्मल गन, साबुन, मास्क, सेनीटाईजर जस्ता स्वास्थ्य सामाग्रीको सम्पूर्ण व्यवस्थापन वीरगञ्ज महानगरपालिकाले गर्ने कर्णले जानकारी दिए ।

यस्तै भौतिक रुपमा कक्षा सञ्चालन सँगसँगै नेपाल सरकारले जारी गरेको विद्यार्थी सिकाई निर्देशिका बमोजिम वैकल्पिक माध्यमबाट हुने सिकाइलाई पनि निरन्तरता दिन विद्यालयहरुलाई निर्देशित गरिएको छ ।

महानगरपालिकाले यहाँका सम्पूर्ण विद्यालयहरुलाई बिहिबारदेखि प्रथम चरणमा कक्षा सूचारु गर्ने मौखिक निर्देशन दिएपनि सामुदायिकहरुले लिखित निर्देशन नआएसम्म विद्यालय सञ्चालन नगर्ने बताउँदै आएका थिए ।

वीरगञ्ज महानगरपालिको सभाहलमा नगरप्रमुख सरावगीको अध्यक्षता भएको छलफलमा शिक्षा शाखाका हरि राउत सहित विभिन्न सामुदायिक विद्यालयका प्रधानाध्यापक र विद्यालय व्यवस्थापन समितिका अध्यक्षहरुको उपस्थिति रहेको थियो ।