वीरगन्ज । कोरोना क्राइसिस म्यानेजमेन्ट सेन्टर (सिसिएमसी) ले गरेको एक अध्ययनअनुसार पर्साको वीरगञ्ज महानगरपालिका र बाराको परवानीपुर गाउँपालिका कोरोनाभाइरसको अत्यन्तै उच्च जोखिममा परेका हुन् ।
वीरगञ्ज र परवानीपुरसँगै नेपालभारीका ४७ स्थानीय तह कोरोना भाइरस संक्रमणको उच्च जोखिममा परेका छन् ।सिसिएमसीको अध्ययनअनुसार २२ स्थानीय तह कोरोनाभाइरसको अत्यन्तै उच्च जोखिममा परेका छन् भने २५ स्थानीय तह जोखिममा परेका छन् ।
त्यसैगरी प्रदेश नम्बर २ को अस्थायी केन्द्र जनकपुरधाम उपमहानगरपालिका पनि अत्यन्तै उच्च जोखिममा परेको छ । तयस्तै उच्च जोखिममा परेका प्रदेश नम्बर २ को धनुषा जिल्लाको मिथिला नगरपालिका, सप्तरीको राजविराज नगरपालिका, सप्तकोसी नगरपालिका र सुरुंगा नगरपालिका, सिराहको सुखीपुर नगरपालिका र लहान नगरपालिका, महोत्तरीको बर्दिबास नगरपालिका र गौशाला नगरपालिका र सर्लाहीको हरिपुर नगरपालिका रहेका छन् ।
सिसिएमसीले मोबाइल एपका आधारमा मानिसको आवतजावतलाई ट्र्याकिङ गरेको थियो । ट्र्याकिङबाट ४७ स्थानीय तह कोरोनाको जोखिममा परेको पाइएको हो । दशैँको चहलपहलसँगै यी ४७ स्थानीय तहमा कोरोना ब्यापक फैलिन सक्ने सिसिएमसीको अनुमान छ ।
सिसिएमसीले अत्यन्तै उच्च जोखिम र उच्च जोखिममा परेका स्थानीय तहको सूची स्वास्थ्य तथा जनसंख्या मन्त्रालयलाई बुझाएको छ । तर, ती क्षेत्रमा हाल कति संक्रमित देखिएका छन् भन्ने तथ्यांकको सूची भने बुझाएको छैन ।
स्वास्थ्य मन्त्रालयले यसअघिसम्म दुई सयभन्दा माथि संक्रमित देखिएको क्षेत्रलाई जोखिम र पाँच सयभन्दा माथि संक्रमित देखिएको क्षेत्रलाई उच्च जोखिममा राखेको थियो ।
मन्त्रालयका अनुसार नेपालमा हालसम्म कोरोना भाइरसबाट १ लाख ७० हजार ७ सय ४३ जना संक्रमित भएका छन् भने १ लाख ३१ हजार २ सय २२ जना निको भएका छन् ।
हाल देशभर ३८ हजार पाँच सय ८४ जना सक्रिय संक्रमित छन् भने ९ सय ३७ जनाको कोरोनाबाट मृत्यु भएको स्वास्थ्य मन्त्रालयले जनाएको छ ।
यी हुन् कोरोना अत्यन्त उच्च जोखिममा परेका २२ स्थानीय तह
रामधुनी नगरपालिका– सुनसरी
बर्जु गाउँपालिका– सुनसरी
राजविराज नगरपालिका– सप्तरी
सप्तकोसी नगरपालिका– सप्तरी
सुरुंगा नगरपालिका– सप्तरी
त्रियुगा नगरपालिका– उदयपुर
उदयपुरगढी गाउँपालिका– उदयपुर
जनकपुरधाम उपमहानगरपालिका– धनुषा
कमलामाई नगरपालिका–सिन्धुली
लिशंखु–पाखर गाउँपालिका– सिन्धुपाल्चोक
मेलम्ची नगरपालिका– सिन्धुपाल्चोक
बलेफी गाउँपालिका– सिन्धुपाल्चोक
नमोबुद्ध नगरपालिका– काभ्रे
धुलिखेल नगरपालिका– काभ्रे
सुनकोसी गाउँपालिका– ओलखढुंगा
काठमाडौं– सबै नगरपालिका
भक्तपुर– सबै नगरपालिका
ललितपुर– सबै स्थानीय तह
मनहरी गाउँपालिका– मकवानपुर
वीरगञ्ज महानगरपालिका– पर्सा
परवनीपुर गाउँपालिका– बारा
भरतपुर महानगरपालिका– चितवन
पोखरा महानगरपालिका– कास्की
यी हुन् कोरोनाको उच्च जोखिममा परेका २५ स्थानीय तह
मेचीनगर नगरपालिका– झापा
कन्काई नगरपालिका– झापा
दमक नगरपालिका– झापा
बेलबारी नगरपालिका– मोरङ
केराबारी गाउँपालिका– मोरङ
लहान नगरपालिका– सिराहा
सुखीपुर नगरपालिका– सिराहा
कटारी नगरपालिका– उदयपुर
दुधौली नगरपालिका– सिन्धुली
तीनपाटन गाउँपालिका– सिन्धुली
मानेभञ्ज्याङ गाउँपालिका– ओखलढुंगा
साकेला गाउँपालिका– खोटाङ
मिथिला नगरपालिका– धनुषा
बर्दिबास नगरपालिका– महोत्तरी
गौशाला नगरपालिका– महोत्तरी
हरिपुर नगरपालिका– सर्लाही
सुनकोसी गाउँपालिका– सिन्धुली
सुनापती गाउँपालिका– रामेछाप
शैलुङ गाउँपालिका– दोलखा
पाँचखाल नगरपालिका– काभ्रे
हेलम्बु गाउँपालिका– सिन्धुपाल्चोक
लिखु गाउँपालिका– नुवाकोट
बेलकोटगढी नगरपालिका– नुवाकोट
थाक्रे गाउँपालिका– नुवाकोट
