वीरगंज संजालवीरगंज। धेरैजसो स्मार्टफोन प्रयोगकर्ताको मुख्य समस्य भनेकै र्यामसँग जोडिएको हुन्छ । र्याम कम छ, गेम राम्रोसँग चलेन, एप चल्न सकेन, फाेन सुस्त भयाे, आदि आदि ।यस्तै समस्या अधिकांशको मुखबाट सुनिन्छ । यसैले मान्छेहरु र्याम बढाउने तरिका खोजिरहेका हुन्छन् । वास्तवमा सैद्धान्तिक रुपमा तपाईंले फोनको र्याम बढाउन सक्नुहुन्छ, तर व्यवहारत: यो सम्भव छैन।
र्याम तपाईंको डिभाइसमा भएको फास्टेस्ट मेमोरी हो । कुनै पनि डेटालाई आदानप्रदान गर्ने क्षमता र्याममा हार्ड ड्राइभ, इन्टरनल स्टोरेज र मेमोरी कार्डको तुलनामा एकदमै धेरै हुन्छ ।तपाईंको फोनमा जति पनि एप्लिकेसन चल्छन् र जति पनि टेम्पोररी डेटा हुन्छन् ती सबै तपाईंको र्याममा स्टोर भएर बस्ने गर्छन् । फोनको र्याम र प्रोसेसरले सँगै काम गर्छन् ।
मानिसहरु प्रोसेसरले र्यामको कमीलाई पुरा गर्ने विश्वास गर्छन्, तर यो झुठो हो । यी दुवैले परस्परमा काम गर्दछन् । तपाईंको प्रोसेसर जति सुकै बलियो भएपनि र्यामको क्षमता कम छ भने डिभाइसले राम्रो काम गर्न सक्दैन । र्यामले सुस्त गतिमा डेटा दिएपनि प्रोसेसरले पनि सुस्त गतिमै डेटा प्रोसेस गर्दछ ।
आफ्नो फोनमा भएको र्यामको कमीलाई पुरा गर्न मान्छेहरु आफूले र्याम बढाएको दाबी गर्छन् । यसका लागि उनीहरु मोबाइलमा भएको रुट एक्सेसबाट फोनलाई रुटिङ गर्दछन् ।त्यसपश्चात र्याम एक्सपान्डर जस्ता एप्लिकेसनको प्रयोग गरी मेमोरी कार्डको केही स्टोरेजलाई र्यामको कामको लागि प्रयोग गर्दछन् ।वा इन्टरनल मेमोरीको केही स्टोरेजलाई र्यामको रुपमा लिने गर्दछन् । यसरी उनीहरुले सैद्धान्तिक रुपमा र्याम त तयार गर्दछन्, तर यसले उनीहरुको सिस्टमलाई अझ धेरै बिगार्ने काम गर्दछ ।
यसको कारण भनेको तपाईंको फोनमा भएको ओरिजिनल र्याम तीव्र स्पिडको हुन्छ । तर तपाईंले बनाउनु भएको स्टोरेजको र्याम भने सुस्त गतिको हुन्छ ।यसरी स्पिड नमिल्दा तपाईंको मोबाइलमा भएको डेटा रिड राइड भइरहन्छ । यसले इन्टर्नल स्टोरेजलाई पनि खराब बनाइदिन्छ । यसकारण यदि तपाईंको फोनमा र्याम कम छ भने एकदमै कम एप्लिकेसन प्रयोग गर्नु होस् र फोनलाई सधै क्लिन राख्नुहोस् ।
