वीरगंज | कुटपिटबाट घाइते भइ ज्यान गुमाएका नेपाल कम्युनिष्ट पार्टी (नेकपा)का पर्सा बिन्दबासिनी गाउँपालिकाका सचिव मुकेश चौरसियाको हत्यारालाई कारबाहीको माग गर्दै शनिबार पनि धर्ना दिइएको छ।चौरसियाका आफन्तजन तथा नेकपा पर्सा जिल्ला समितिले जिल्ला प्रहरी कार्यालयको अगाडि विरोध स्वरुप धर्ना दिएको हो। चौरसिया हत्याको जाहेरी प्रहरीले नलिएको भन्दै आफन्तजन तथा पार्टी समितिले विरोध स्वरुप धर्ना दिएको हो।

धर्नामा चौरसियाका आफन्त, स्थानीयबासी, पार्टीका नेता कार्यकर्ताहरुको सहभागिता रहेको छ। सुनियोजित तरिकाले कुटपिट गरी हत्या गरिएको भन्दै उनका आफन्तले प्रहरीमा जाहेरी दिन जाँदा पर्सा प्रहरीले हालसम्म पनि जाहेरी लिन मानेको छैन।जिल्ला प्रहरी कार्यालय अगाडि भएको धर्ना कार्यक्रमलाई सम्बोधन गर्दै नेकपाका नेताहरुले प्रहरीले जाहेरी लिन नमानेको भन्दै जाहेरी नलिएसम्म आन्दोलन जारी रहने बताएका छन्। उनीहरुले जाहेरी नलिए अगामी दिनमा प्रदेश नम्बर २ हुँदै देशव्यापी आन्दोलन चर्काउने चेतावनीसमेत दिएका थिए।

धर्ना कार्यक्रमलाई सम्बोधन गर्दै नेकपाका नेता मातृका यादवले गृहमन्त्रीदेखि डीआईजी र प्रमुख जिल्ला अधिकारीले पनि आफूलाई जाहेरी दर्ता हुन्छ भनेर आश्वासन दिएको भएपनि अहिलेसम्म प्रहरीले मुद्दा दर्ता नगरेको भन्दै आक्रोश व्यक्त गरेका थिए।प्रहरीले जाहेरी दर्ता नगरेर आफूलाई संविधानभन्दा पनि ठूलो देखाउन खोजेको उनले आरोप लगाए। नेकपा स्थायी समिति सदस्यसमेत रहेका यादवले जाहेरी दर्ता नभए आफूले प्रदेश २ सँगै पार्टीका वरिष्ठ नेताहरुसित सल्लाह गरेर आन्दोलनलाई देशव्यापी बनाउने चेतावनी दिए।

‘जाहेरी दर्ता भएन भने २ नम्बर प्रदेशमा आफ्नै साथीहरुसँग सल्लाह गरेर पनि आन्दोलन चलाउन सक्छु’, उनले भने।जनताको जाहेरी प्रहरी प्रशासनले लिनुपर्ने र सही–गलत छुट्याएर अदालतमा पेश गर्नुपर्ने सुझाव यादवले दिए। धर्ना कार्यक्रमलाई सम्वोधन गर्दै नेकपा प्रदेश २ का सह–इञ्चार्ज नोन्द्र चौधरीले आफूहरुले न्यायको माग गरिरहेको बताउँदै प्रहरी प्रशासनले कुर्सीमा बसेर अन्याय गर्नु भन्दा कुर्सी छोडनु पर्ने बताएका थिए।

दसैँको बेलामा अहिले घरमा पूजा गर्नुपर्ने भएपनि न्याय खोज्नको लागि आफूहरुले आन्दोलन गर्नुपरेको चौधरीको भनाइ थियो।गत बिहीबार बिन्दबासिनी गाउँपालिका कमिटीको सपथ ग्रहण कार्यक्रम चलिरहँदा भएको झडपमा परी गाउँपालिकाका पार्टी सचिव मुकेश चौरसिया गम्भीर घाइते भएका थिए।उनको शुक्रबार बिहान उपचारको क्रममा मृत्यु भएको थियो। चौरसियाको शवलाई नारायणी अस्पतालमा राखिएको छ। उनका परिवारले जाहेरी दर्ता नभएसम्म शव नबुझने र पोष्टमार्टम हुन नदिने अडान राखेका छन्।