पर्सा | कोरोना महामारीको कारण यस वर्षको दशैंमा वीरगंजमा पूजापाठ तथा बलि दिन जिल्ला प्रशासन कार्यलयले निषेध गरेको छ।जिल्ला प्रशासन कार्यालय पर्सामा बसेको जिल्ला सुरक्षा समितिको बैठकले कोभिड–१९ को रोकथाम, नियन्त्रण र व्यवस्थापनलाई प्रभावकारी बनाउन जिल्लाभित्र रहेका गहवा माई, विर्ता माई, नगवा माई र विन्दवासिनी माई मन्दिरलगायतका शक्तिपिठमा सर्वसधारणलाई दर्शन गर्न रोक लगाउने निर्णय गरेको छ।
जिल्ला सुरक्षा समितिको बैठकले कोरोना संक्रमण महामारीलाई मध्यनजर गर्दै भिडभाड नियन्त्रणका लागि मेला, पूजापाठ, फुटपाथ पसल तथा बलि निषेध गर्ने निर्णय गरेको हो। जिल्ला प्रशासन कार्यलयले घरमै पूजापाठ गरी धार्मिक आस्थामा आँच नआउने गरी हिन्दुहरुको महान पर्व वडा दशैं मनाउन आग्रह गरेको पर्साका प्रमुख जिल्ला अधिकारी आस्मान तमाङ्गले जानकारी दिए।
समितिको बैठकले सार्वजनिक खुल्ला स्थान चौर चौक बाटोमा बनाइने दुर्गा झाँकी वा पण्डाल नबनाउन, प्रत्येक व्यक्तिले आआफ्नो घर निवासमा पूजा गर्न, सार्वजनिक मन्दिर वा स्थानमा भीडभाड गर्न नपाइने लगायतका नियमहरु लागू गराउने निर्णय भएको जनाएको छ।
कुनै पनि प्रकारको भिडभाड हुने प्रतिस्प्रधात्मक खेल वा प्रतियोगिता नगर्ने, मेला जात्रा महोत्सव कन्सर्ट जस्ता भिडभाड हुने कार्यक्रम नगर्न नगराउन गरेको निर्णयले यसपटकका चाडपर्व खल्लो हुने कतिपयको बुझाई छ।लोक संस्कृतिका जानकार उमाशंकर द्विवेद्वी भन्छन्, ‘नेता कार्यकर्ताको कार्यक्रम गराउन छुट दिने प्रशासनले पहिला आफै पूजा गरेर दुर्गामातासँग क्षमा माग्नुपर्ने बताए।
वीरगंज बजारको मुख्य क्षेत्रमा फूलपातीको दिनदेखि नवमीको दिनसम्म सवारी साधन सञ्चालनमा आवश्यकताअनुसार रोक लगाउन सकिने, फूलपाती भित्र्याउने कार्यक्रम सांकेतिक रुपमा मात्र गर्ने त्यसैगरी गहवामाई विन्दवासिनी माई, विर्तामाई नगवा मन्दिरमा नेपाल प्रहरी र सशस्त्र प्रहरीले सुरक्षा व्यस्था मिलाउने साथै ती मन्दिरहरुको वरपर कुनै प्रकारको बजार संचालन गर्न नपाइने लगायत नियमहरुको पालना गर्न जिल्ला प्रशासनले निर्देशन दिएको छ।
हिन्दुहरुको महान पर्व वडा दशैंको बेला भारत विहारको रक्सौल, बेतिया, सुगौली, सिवान लगायतको क्षेत्रबाट आउने भारतीय तिर्थ यात्रीहरुले वीरगंजमा भव्य मेला लाग्ने गरेको छ।मेलाको क्रममा लगाईने मनोरञ्जनात्मक कार्यक्रमहरुले भरिभराऊ हुने वीरगंज कोरोना कहरले यसवर्षको मेला सुनसान हुने देखिन्छ।स्थानीय प्रशासनले चाडपर्वलाई लक्षित गरेर भिडभाड हुने कार्यक्रम नगर्न निर्देशन जारी गरे पनि वीरगंजमा पार्टी प्रवेशका कार्यक्रम भने भइरहेका छन्।nepalsamaya
