आज:

विरगंजको रेशमकोठिमा छापा, २२ किलो सुन बरामद

वीरगंज संजाल

१ कार्तिक २०७७, शनिबार १६:०८

६०९७

विरगंज । विरगंजको गणेश अपार्टमेन्टबाट साढे २२ किलो सुन बरामद भएको छ ।

पर्सा प्रहरीले विरगंजस्थित गणेश एपार्टमेन्टबाट करिब साढे २२ किलो सुन र ३ किलो चाँदी बरामद गरेको छ ।

विरगंज महानगरपालिका वडा नं. ५ रेशमकोठीमा रहेको श्री गणेश एपार्टमेन्टको तेस्रो तल्लाको ३०३ नम्बरको फ्ल्याटबाट सो परिमाणको अवैध सुन र चाँदी बरामद गरेको जनाएको छ । सुन तथा चाँदी लुकाईछिपाई राखिएको छ भन्ने विशेष सूचनाको आधारमा जिल्ला प्रहरी प्रमुख प्रहरी उपरीक्षक गंगा पन्तको नेतृत्वमा गएको प्रहरीको टोलीले भारत पूर्वी चम्पारण हरैया निवासी अशोक सिन्हाको बस्ने गरेको उक्त फ्ल्याटबाट स्थानीय सो सुन र चाँदी बरामद गरेको हो । प्रहरीले सुनको बिस्कुट १ के.जी.को दरले १३ वटा १३ केजी, सुनको बिस्कुट मझौला ४६ पिस अर्थात ८ के.जी.५७६ ग्राम, सुनको बिस्कुट सानो १०० ग्रामको दरले १० पिस १ के.जी. गरी जम्मा जम्मा २२ के.जी.५७६ ग्राम सुनको बिस्कुट बरामद गरेको छ । साथै, ६८१ ग्राम सुनका विभिन्न गरगहानाहरु पनि बरामद भएको छ ।

यस्तै , २ के.जी.२६२ ग्राम चाँदीको गरगहाना तथा थाल लगायत भाडाकुंडा पनि बरामद भएको प्रहरी उपरीक्षक गंगा पन्तले जानकारी दिइन् ।

बरामद सो परिमाणको अवैध सुन र चाँदी जिल्ला प्रहरी कार्यालयमा ल्याई थप अनुसन्धान कार्य भइरहेको एसपी पन्तले बताइन् ।

प्रदेश नम्बर २ का प्रहरी प्रमुख डीआईजी धीरज प्रताप सिंहले विशेष सूचनामा आधारमा प्रहरीले अपार्टमेन्टमा छापा मारेको बताए । सो अपार्टमेन्टमा भारतीय नागरिक आशोक सिन्हा भाडामा बस्दै आएका थिए ।

प्रहरीका अनुसार पर्साका प्रमुख जिल्ला अधिकारी आस्मान तामाङसम्म अपार्टमेन्टमा अवैध सुन लुकाएर राखिएको सूचना पुगेको थियो । सो सूचनापछि प्रहरी अपार्टमेन्टमा छापा मार्न पुगेको थियो ।