काठमाडौं । सांसदहरुले उपत्यकामा कोरोना नियन्त्रणका लागि सरकारले कडा कदम चाल्नुपर्नेमा सुझाव दिएका छन्।प्रतिनिधि सभाको शिक्षा तथा स्वास्थ्य समितिअन्तर्गतको ‘कोभिड १९ नियन्त्रणमा सरकारको कामकारबाही अनुगमन उपसमिति’ले काठमाडौं उपत्यका प्रवेशको नाका सिल नगरे कोरोना महामारी थप भयावह हुने चेतावनी दिएको छ।काठमाडौंको कोरोना गाउँगाउँमा जाँदा स्थिति भयावह हुनसक्ने भन्दै सांसदहरुले नाका सिलमा जोड दिएका हुन।
सोमबार संघीय संसदको शिक्षा तथा स्वास्थ्य समितिको बैठकमा उपसमितिले गरेको अध्ययन र अनुगमनको निष्कर्ष र सुझाव सुनाउँदै संयोजक जीवनराम श्रेष्ठले काठमाडौं उपत्यका कोरोनाको हटस्पट भएकाले त्यसलाई नियन्त्रण सरकारले कडा कदम चाल्नुपर्ने सुझाव दिएको बताए।चाडबाडमा चहलपहल निकै बढेको र यस्ता गतिविधिले कोरोना तीव्ररुपमा फैलिरहेको निष्कर्षसहित दसैँं–तिहारको समयमा उपत्यका बाहिरिने र भित्रिने दुवै प्रक्रिया बन्द गर्नुपर्ने संसदीय उपसमितिले सुझाव दिएको हो।
उपत्यकामा फैलिएको कोरोना बाहिरी जिल्लामा नजाओस् भन्ने हेतूले दशैं तिहारमा उपत्यकाको बोर्डर सिल गर्नुपर्ने उपसमितिले सुझाव दिएको भन्दै श्रेष्ठले काठमाडौं बाहिर जाने र भित्र आउने दुवै प्रक्रिया बन्द गर्नुपर्ने आफूहरुको सुझाव रहेको बताए।
आफूहरुले काठमाडौं उपत्यकाभित्र र बाहिर अनुगमन गरेको भन्दै श्रेष्ठले उपत्यकाभन्दा बाहिर झनै कोरोना भाइरसको प्रकोपबाट बच्न सुरक्षाका उपाय नअपनाएको पाइएको बताए।सरकारी कार्यालयदेखि सबैतिर भीडभाड रहेको, नागरिकले मास्क नै प्रयोग नगरेको अवस्था रहेको भन्दै श्रेष्ठले यस्तो व्यवहारले कोरोना संक्रमण अझैं भयावह हुने अवस्था रहेको बताए।
संसदीय उपसमितिको बैठकमा सहभागी स्वास्थ्य तथा जनसंख्या मन्त्रालयका प्रमुख विशेषज्ञ डा. रोशन पोखरेलले लकडाउन, निषेधाज्ञा वा बोर्डर सिल गर्ने विषय राजनीतिक निर्णय भएको बताएका छन्।उपसमिति बैठकमा कतिपय सांसदहरुले दशैं तिहारको समयमा १०/१५ दिन निषेधाज्ञा नै गर्नुपर्ने समेत सुझाव दिएका थिए। त्यस्तै, राजनीतिक दलका नेता कार्यकर्ताहरु नै भीडभाड गर्ने, पार्टी प्रवेशदेखि विभिन्न कार्यक्रम राखेर समस्या पारिरहेको सांसदहरुले बताएका थिए।
