जनकपुर । कोरोना महामारीका कारण सर्वसाधारणको जीवन प्रभावित भइरहेको समयमा प्रदेश २ मा भने संसदीय विकास कोष अन्तर्गतको रकम चरम दुरुपयोग भएको पाइएको छ । कोरोनाको कहरले कयौं जनतालाई हातमुख जोर्न समस्या भइरहेको अवस्थामा जनकपुरधाम उपमहानगर क्षेत्रभित्रै बस्ती नभएको स्थानमा कोषअन्तर्गतको रकम खर्चिएर पीसीसी ढलान गरी सडक निर्माण गर्नुका साथै विद्युतका पोल तथा तारसमेत पु¥याइएको हो ।

जनकपुरधाम उपमहानगरपालिकाको वडा नम्बर २३ ग्रामिण क्षेत्रमा पर्दछ । उपमहानगर विस्तारका क्रममा विन्धी गाउँलाई समेटेर २३ नम्बर वडा बनाइएको हो । सोही वडाको बस्तीमा रहेका सडक वर्षायाममा हिलाम्य हुन्छन् । जसले गर्दा पैदल हिँडडुलमा समेत निकै नै सास्ती हुने गर्दछ ।

सो वडाका बस्तीमा रहेको सडकलाई ढलान नगरी बस्ती नै नरहेको क्षेत्र तथा खेततिर पीसीसी ढलान गरेर सांसद विकास कोषको लाखौँ रकम अनियमितता गरेको पाइएको हो । जनकपुरधामको बस पार्कको उत्तरपश्चिम कुनामा रहेको २५ बिघा खाली जग्गा प्लटिङ गरी भूमाफियाले घडेरीका रुपमा विक्री गर्न खोजेका छन् । उक्त जग्गाकै मूल्य बढाउनका लागि भौतिक पूर्वाधार निर्माण गर्नका लागि संसदीय विकास कोषको रकम खर्च गरिएको हो । चौरी (खाली जग्गा) मा सांसद विकास कोषको रकम खर्चिएर १४ फिट र १२ फिटको पीसीसी सडक ढलान गरिएको छ ।

प्रदेशसभा सदस्य परमेश्वर साहले आफ्नो संसदीय विकास कोषको रकम खचिएर ढलान गराएका हुन् । जग्गा दलालहरु प्रदेशसभा सदस्य साहको निकटका मान्छे रहेका कारण मानव बस्ती नै नरहेको जग्गामा बाटो ढलान गराउन लगाएको स्थानीयवासीको आरोप छ । प्रदेशसभा सदस्य साहले आफ्नो ३ करोड रुपैयाँको संसदीय क्षेत्र विकास कोषको रकमबाट ८० लाख रुपैयाँ सोही पीसीसी सडक निर्माणका लागि खर्चेका छन् ।
जन दबाबकै कारण सो ठाउँमा पीसीसी ढलानका लागि रकम उपलब्ध गराएको प्रदेशसभा सदस्य साहको दावी छ । ‘न कुनै भूमाफियासँग मेरो साँठगाँठ छ, न मेरो त्यहाँ निजी जग्गा छ,’ उनले भने, ‘त्यहाँ सडक निर्माणका लागि दवाब आयो, त्यही भएर मैले त्यहाँ संसदीय विकास कोषको रकम प्रयोग गरेँ ।’

जनताको भलो हुने उद्देश्यले आफुले आफ्नो संसदीय विकास कोषको रकम प्रयोग गरेको उनको भनाइ छ ।
जनकपुरधाम उपमहानगरपालिका वडा नम्बर २३ का वडाध्यक्ष शत्रुधन पाण्डेले पीसीसी ढलान गरिएको विषयमा आफुलाई जानकारी नरहेको बताए । उनले भने, ‘त्यहाँ पीसीसी ढलान गरी सडक निर्माण गरिएको विषयमा मलाई जानकारी छैन, मलाई जानकारी नै नगराई कुनै सांसदले त्यहाँ ढलान गराउँछ भने मैले के गर्ने ?’

२५ बिघाभन्दा बढी खाली जग्गा रहेको सो प्लटमा कयौँ भूमाफियाको लगानी रहेको स्थानीयवासीको भनाइ छ ।
खाली जग्गामा आर्थिक मसान्तको अन्तिम समयमा पीसीसी ढलान गरी बनाइएको पक्की सडक असोज लाग्दा नलाग्दै फुट्न थालेको छ ।
केही महिना अगाडिसम्म डेढ लाख रुपैयाँको धूरमा कारोबार हुँदै आएको जग्गा खेती योग्य स्थानमा प्लटिङ गरी पीसीसी ढलान गरी बाटो निर्माण गरेसँगै साढे २ लाख रुपैयाँदेखि साढे ४ लाख रुपैयाँसम्ममा विक्री भईरहेको स्थानीय रंजय पाण्डेयले जानकारी दिए ।

प्रदेशसभा सदस्य साहले आफ्नो संसदीय कोषको रकम ७ वटा योजनामा खर्चेका छन् । उनले आफ्नो अधिकांश योजना आफू निकटका ठेकेदार तथा कार्यकर्तालाई दिएका छन् । कोषबाट खर्चिएको रकमलाई कुनै न कुनै रुपमा असुल हुने गरी योजना छनोट गर्ने गरिएको सांसद साहकै एक सहयोगीको भनाइ छ ।