कोरोना महामारीसँगै गएको ७ महिनादेखि विद्यालय ठप्प हुँदा पीडित परिवारका अभिभावकलाई बालबालिकाको चिन्ता बढ्दै गएको थियो। विद्यालय कहिले खुल्ने टुंगो नभएपछि उनीहरुले आफूहरु बहालमा बस्दै आएको घरमै बालबालिकाको अध्ययनका लागि ट्युसनको सुरुवात गरेका थिए। तर, सोही ट्युसन पीडित परिवारका लागि अवगाल बन्न पुग्यो।

गत बैशाखबाट ट्युसनका लागि पीडित परिवार बस्दै आएको घरमा विराटनगर महानगरपालिका १६ का गौरव साह पुग्ने गरेका थिए। सुरुका ६ महिना साहले ट्युसन पढाइसकेका थिए। तर, २१ वर्षीय साहले शनिबार ट्युसन पढ्दै आएकी ५ वर्षीया बालिकामाथि गिद्धे दृष्टि राखे। विगत ६ वर्षदेखि बहालमा बस्दै आएका पीडित परिवारकी नर्सरीमा पढ्दै आएकी बालिकालाई शनिबार बलात्कार गरे।

विराटनगर रानीस्थित इलाका प्रहरी कार्यालयका प्रहरी निरीक्षक दीपक थापाका अनुसार साहले पीडित बालिकासँगै उनका ११ वर्षीय दाजु, ४ वर्षीय भाइ र घरबेटीका ९ वर्षीय छोरालाई सँगै ट्युसन पढाउदै आएका थिए।

सोही क्रममा शनिबार ५ वर्षीया बालिकामाथि बलात्कार गरेको देखेपछि ट्युसन पढ्दै आएका विद्यार्थीहरुले हल्लिखल्ली गरेका थिए। यसक्रममा पीडित बालिकाले समेत घटनाबारे अभिभावकलाई जानकारी गराएकी प्रहरी निरीक्षक थापाले बताए ।
स्थानीय गौतम बुद्ध स्कुलमा अध्ययनरत सबै विद्यार्थीहरुलाई पढाउनका लागि छिमेकका साहलाई पीडित परिवारले ट्युसनका लागि आग्रह गरेको अनुसन्धानका क्रममा खुलेको उनले बताए ।

पीडित बालिकाकी आमाले कोरोनाका कारण विद्यालय बन्द भएपछि पढाई नबिग्रियोस् भन्नका लागि ट्युसन लगाएको बताइन्। उनले भनिन्, ‘बालबालिकाले विद्यालय नखुल्दा पढेका कुरा बिर्सने स्थिति देखिएपछि छिमेककै युवालाई घरमै बोलाएर ट्युसन पढाउन लगाउने निधो गर्‍यौँ। तर पढाउन आएकैले यस्तो गरिदिए।’

बलात्कारमा परेकी बालिकालाई विराटनगरको कोशी अस्पतालमा उपचारका लागि लगिएको प्रहरीले जनाएको छ ।
बालबालिकाको पढाएलाई यथावत राख्नका लागि उनीहरु पढिरहेका विद्यालयका शिक्षकले नै ट्युसनको सल्लाह दिएको पीडित परिवारले जनाएको छ । प्रहरीले पक्राउ परेका साहविरुद्ध आइतबार जबरजस्ती करणी मुद्दा चलाउन अदालतबाट म्याद थप गरेर घटनाको अनुसन्धान सुरु गरेको छ ।