‘हरर मुभी’ हेर्ने व्यक्तिहरू कोरोना भाइरस संक्रमणको महामारीमा कम विचलित हुने हालै गरिएको एक अध्ययनले देखाएको छ । मिडिया, सञ्चार र समाज र डेनमार्कको आर्कस विश्वविद्यालयअन्तर्गतकाे स्कुल अफ कम्युनिकेसन एण्ड कल्चरका लागि अनुसन्धान कार्यक्रमले उक्त अध्ययन गरेकाे हाे ।यो अनुसन्धान सानो संख्यामा गरिए पनि यसले अर्थपूर्ण तथ्यहरू बाहिर ल्याएको अनुसन्धानकर्ताहरूले दाबी गरेका छन् । यूकेबाट प्रकाशिन हुने इन्डिपेन्डेन्ट डट यूकेको अनलाइन संस्करणले यस अनुसन्धानका विषयमा समाचार प्रकाशित गरेको छ ।अधिकांश व्यक्तिहरू केही सिक्नुको सट्टा मनोरञ्जन लिने उद्देश्यले हरर फिल्म हेर्छन्, तर पनि हरर फिल्मका कथाले पर्याप्त शिक्षण अवसर प्रदान गर्दछ,’ उक्त रिपोर्टमा भनिएको छ ।
‘फिक्सन’ले दर्शकलाई थोरै मात्रामा विश्वको कल्पनामा डुबाउँछ । तर, हरर फिल्मले काल्पनिक माध्यमबाट व्यक्तिहरू खतरनाक शिकारीहरूबाट बच्न, सामाजिक परिस्थितिको नकारात्मक अवस्था र नकारात्मक पात्रको दिमाग पढ्न र भावनात्मक सीपको अभ्यास गर्न सिकाउँछ ।’
अध्ययनमा ३ सय १० सहभागीलाई सम्मिलित गरिएकाे थियो । सहभागी सबै उत्तरदाताले कोरोना महामारीका केही महिनामा कम मानसिक समस्या भोगेको भन्ने उत्तर दिएका थिए ।‘हरर चलचित्रले मनोवैज्ञानिक रूपमा विचलित हुनबाट पहिलै नै मानिसहरूलाई अभ्यस्त बनाइसकेको हुन्छ । यसले नकारात्मक भावनालाई नियन्त्रण गर्न सक्ने मानसिक क्षमता वृद्धि गराएको हुन्छ,’ अध्ययन भन्छ ।
‘नकारात्मक भावनालाई सुरक्षित तरिकाले नियन्त्रण गर्ने अनुभव हरर चलचित्र हेर्दाका बखत व्यक्तिहरूले सँगालेका हुन्छन् । डरसँग कसरी व्यवस्थापन गर्ने, कस्ता रणनीति बनाउने र वास्तविक जीवनमा डरलाग्दो परिस्थितिमा शान्तपूर्वक बस्ने तरिकाहरू पनि सिकिसकेका हुन्छन्,’ रिपाेर्टमा भनिएकाे छ ।
यद्यपि, प्रतिरोधी क्षमता बढाउन भनेर हरर फिल्म नहेरेका व्यक्तिहरूलाई खोजीखोजी नहेर्न पनि अनुसन्धानकर्ताहरूले सुझाएका छन् ।‘यदि कसैले डरलाग्दा चलचित्रहरूलाई घृणा गर्छन् भने उनीहरूलाई यस्ता चलचित्रले अझ खराब स्थितिमा पुर्याउँछ,’ अनुसन्धानकर्ताहरूले खुलाएका छन्, ‘यदि, भावनात्मक व्यवस्थापन गर्ने सीपमा सुधार भइरहेको छ र महामारीको सामना गर्न मद्दत गर्दछ भने तपाईंले हरर चलचित्र हेर्दा पनि उत्तम हुन सक्छ ।’
