वीरगंज | अभिनेता सुशान्त सिंह राजपुतको मृत्यु पछि भारतमा भएको ड्रग्सको कारोबार र प्रयोगबारेको छानबिन अब अर्को तहमा पुगेको छ । भारतको नारकोटिक्स कन्ट्रोल ब्यूरो (एनसिबी)ले अब अभिनेत्रीहरु दीपिका पादुकोण, श्रद्धा कपुर तथा सारा अलि खानसँग कयौँ घन्टा सोधपुछ गरेको छ ।
एनसिबीका एक अधिकारीका अनुसार अब यी तीन अभिनेत्रीले दिएको बयान दर्ज भएको छ । यसअघि शुक्रबार अभिनेत्री रकुल प्रित सिंह तथा दीपिका पादुकोणकी म्यानेजर करिश्मा प्रकाशसँग पनि सोधपुछ भएको थियो । करिश्मा प्रकाशसँग शनिबार पनि सोधपुछ भएको बताइएको छ ।
अहिलेसम्म यो घटनामा १८ जनाभन्दा बढी पक्राउ परिसकेका छन् । यसअघि यही घटनामा सुशान्तकी गर्लफ्रेन्ड रिया चक्रवर्तीसँग सोधपुछ भइसकेको छ । अहिले उनी भारतीय प्रहरीको हिरासतमा छिन् ।
टाइम्स नाउको रिपोर्टअनुसार दीपिकाले पनि ड्रग्सबारे करिश्मासँग पहिले कुराकानी भएको बताएकी छिन् । यसअघि उनले लागूऔषधबारे गरेको कुराकानी बाहिर आएको थियो । भारतीय मिडियाहरुको रिपोर्टअनुसार दीपिकाले आफूले च्याट गरेको स्वीकार गरे पनि उनले लागूऔषध सेवन नगरेको बताएकी छिन् ।
श्रद्धा कपुर र सारा अली खानले पनि आफूहरुले लागूऔषध सेवन नगरेको बताएका छन् । साराले चाहिँ आफू सुशान्तसँग थाइल्यन्ड घुम्न गएको स्वीकार गरेकी छिन् ।
