वीरगंज  | सरकारले कोरोना सङ्क्रमितको उपचारमा प्रयोग भइरहेको रेम्डेसिभिर औषधि निःशुल्क पाइने बताएको छ । रेम्डेसिभिर औषधिमा कालोबजारी भएको, सरकारले उपलब्ध नगराएको जस्ता गुनासो बढेको भन्दै सरकारले कोरोना सङ्क्रमितको उपचार हुने स्वास्थ्य संस्थामा यो औषधि निःशुल्क उपलब्ध गराइरहेको बताएको हो ।

औषधि व्यवस्था विभागका महानिर्देशक नारायणप्रसाद ढकालले रेम्डेसिभिर औषधि कोरोना सङ्क्रमितको उपचारका लागि मान्यता प्राप्त औषधि नभइ क्लिनिकल परीक्षण भइरहेको औषधि भएकोले बिरामीको इच्छा अनुसार मात्र प्रयोग भैरहेको बताउनुभयो ।

यो औषधिले सङ्क्रमण भएर अस्पतालमा बसेका बिरामीहरुलाई केही चाँडो डिस्चार्ज गर्न सहयोग गरिरहेकोले प्रयोग भइरहेको र आवश्यकताअनुसार प्रयोग भइरहेको पनि उहाँले बताउनुभयो ।

कोरोना सङ्क्रमितको उपचारको लागि अहिलेसम्म कुनै पनि औषधि पत्ता लागि नसकेको भन्दै ढकालले अहिले प्रयोग भइरहेका लक्षणअनुसार उपचार गर्ने औषधिहरु नेपालमा अभाव नरहेको बताउनुभयो ।